George Michael
George Michael | |
|---|---|
 Michael árið 1988 | |
| Fæddur | Georgios Kyriacos Panayiotou 25. júní 1963 |
| Dáinn | 25. desember 2016 (53 ára) Goring-on-Thames, England |
| Störf |
|
| Ár virkur | 1981–2016 |
| Maki |
|
| Tónlistarferill | |
| Stefnur | |
| Útgefandi | |
| Áður meðlimur í |
|
| Vefsíða | georgemichael |
| Undirskrift | |
 | |
George Michael (f. Georgios Kyriacos Panayiotou; 25. júní 1963 – 25. desember 2016) var breskur tónlistarmaður. Hann reis til frægðar með tvíeykinu Wham! á 9. áratugnum og hélt svo áfram með sólóferil.
Æska[breyta | breyta frumkóða]
George Michael ólst upp í norður-London. Faðir hans var Kýpur-Grikki og veitingamaður og móðir hans var enskur dansari. Michael sagði að mikil vinna foreldra hans hafi komið niður á honum og þau hafi vanrækt hann. Á táningsárum Michaels flutti fjölskyldan til Hertfordshire. Í skóla þar hitti hann Andrew Ridgeley sem hann deildi tónlistaráhuga með.
Wham![breyta | breyta frumkóða]
Michael og Ridgeley stofnuðu ska-hljómsveit sem lifði stutt en árið 1981 stofnuðu þeir hljómsveitina Wham!. Þeir gáfu út lagið „Wham Rap!“ í fyrstu sem hlaut litlar undirtektir en síðar fengu þeir að koma fram með lagið „Young Guns (Go For It)“ í þættinum Top of the Pops sem varð til þess að plata þeirra, Fantastic, fór í 3. sæti breska listans. Í fyrstu var tvíeykið klætt í leðurföt en síðar varð klæðnaðurinn tískumiðaðri. Hljómsveitin átti meðal annars smellina „Wake Me Up Before You Go-Go“ og „Careless Whisper“. Wham! hætti árið 1986 en það var orðið ljóst að Michael var mun áberandi og frambærilegri en félagi hans. Því hóf hann sólóferil.
Sólóferill[breyta | breyta frumkóða]
Michael gaf út árið 1987 lagið „I Knew You Were Waiting (For Me)“ með tónlistargoði sínu Aretha Franklin. Platan Faith kom út sama ár og fór hún á toppinn í Bretlandi og Bandaríkjunum. Fyrsta smáskífan, „I Want Your Sex“, olli nokkru fjaðrafoki í Bandaríkjunum og sumar útvarpsstöðvar neituðu að spila það. Árið 1988 var Michael uppgefinn eftir tónleikaferðalag og upplifði þunglyndi. Næsta plata hans, Prejudice Vol. 1, var hvorki fylgt eftir með tónleikaferðalagi né tónlistarmyndböndum. Fyrirætlunin var að gefa út síðar Prejudice Vol. 2 en Michael fór í málaferli við Sony-útgáfuna sem varð til þess að hann sagði skilið við útgáfuna.
Árið 1994 gaf Michael út lagið „Jesus to a Child“ en það var óður til fyrrum elskuhuga síns, brasilíska fatahönnuðarins Anselmo Feleppa, sem lést af völdum heilablóðfalls árið áður. Lagið kom út á plötunni Older árið 1996 en það tók 3 ár að ljúka við hana. Platan gerði það gott í Bretlandi og Evrópu en í Bandaríkjunum seldist hún ekki vel. Dauði móður Michaels úr krabbameini varð til þess að Michael fór í annað þunglyndi. Hann íhugaði sjálfsmorð en sagði að nýr kærasti hans, Kenny Goss, hafi aftrað honum frá því.
Árið 1998 var Micheal handtekinn á almenningsklósetti í Los Angeles og kærður fyrir ósiðlega framkomu. Michael kom stuttu síðar út sem samkynhneigður og opinberaði samband sitt við Goss. Árið 2006 fór Michael í sitt fyrsta tónleikaferðalag í 15 ár. Hann var handtekinn dæmdur árið 2010 fyrir akstur af völdum fíkniefna og dæmdur í 8 vikna fangelsi. Árið 2011 fyrir tónleika í Prag lýsti Michel því yfir að hann og Goss hefðu skilið 2 árum áður og kenndi hann fíknivanda beggja um það. Sama ár hafði hann dvalið á sjúkrahúsi vegna lungnabólgu.
George Michael lést á jóladag árið 2016 á heimili sínu í Goring, Oxfordshire. Umboðsmaður hans sagði andlátið tilkomið vegna hjartaáfalls.[2]
Sólóskífur[breyta | breyta frumkóða]
- Faith (1987)
- Listen Without Prejudice Vol. 1 (1990)
- Older (1996)
- Songs from the Last Century (1999)
- Patience (2004)
- Symphonica (2014)
Tilvísanir[breyta | breyta frumkóða]
- ↑ „George Michael“. Desert Island Discs. 5. október 2007. BBC Radio 4. Afrit af uppruna á 27. febrúar 2015. Sótt 18. janúar 2014.
- ↑ Obituary: George Michael BBC. Skoðað 26. des. 2016
