Evrópukeppni kvenna í knattspyrnu
Evrópukeppni kvenna í knattspyrnu (enska: UEFA European Women's Football Championship stytt í Euros) er knattspyrnumót evrópulanda sem haldið hefur verið frá árinu 1984, framan af annað hvert ár en í seinni tíð á fjögurra ára fresti. Þýskaland er sigursælasta liðið með átta meistaratitla.
Óopinber mót 1957-79
[breyta | breyta frumkóða]Áður en Knattspyrnusamband Evrópu hóf skipulagningu Evrópukeppna kvenna voru gerðar tilraunir til að halda úti óopinberum mótum, jafnvel í hreinni óþökk yfirvalda knattspyrnumála. Árið 1957 stóðu Evrópusamtök knattspyrnukvenna fyrir fjögurra leikja móti í Vestur-Berlín með þátttöku Vestur-Þjóðverja, Hollendinga, Austurríkiskvenna og Englendinga, sem fóru með sigur af hólmi.[1] Kvennaknattspyrna var bönnuð í Vestur-Þýskalandi á þessum árum, en bannið var lítt í heiðri haft.
Næsta óopinbera Evrópumót fór fram á Ítalíu árið 1969. Aftur voru þáttökuliðin fjögur talsins og fóru heimakonur með sigur af hólmi.[2] Tíu árum síðar, sumarið 1979, var tólf liða Evrópumót haldið á Ítalíu. Danir urðu meistarar og varð keppnin til að þrýsta á knattspyrnusambönd álfunnar að taka greinina almennilega upp á sína arma.[3]
