Ernst Willimowski

Úr Wikipediu, frjálsa alfræðiritinu
Jump to navigation Jump to search
Ernst Willimowski
Ernest Wilimowski 1936.jpg
Upplýsingar
Fæðingardagur 23. júní 1916
Fæðingarstaður    Kattowitz, Prússneska Héraðið Slesía, Þýska keisaraveldið
Dánardagur    30. ágúst 1997 (81 árs)
Dánarstaður    Karlsruhe, Baden-Württemberg, Þýskaland
Leikstaða Framherji
Yngriflokkaferill
1925-? 1. FC Kattowitz
Meistaraflokksferill1
Ár Lið Leikir (mörk)
1934-1939
1939–1940
1940-1942
1942-1944
1946-1947
1948
1949-1950
1950-1951
1951-1955
Ruch Chorzów
1. FC Katowitz
PSV Chemnitz
1860 Munich
SG Chemnitz-West
BC Augsburg
Offenburger FV
FC Singen 04
VfR Kaiserslautern
86 (112)
? (?)
? (68)
? (9)
? (?)
6 (3)
89 (70)
30 (16)
90 (70)   
Landsliðsferill
1934–1939
1941-1942
Pólland
Þýskaland
22 (21)
8 (13)

1 Leikir með meistaraflokkum og mörk
talið í aðaldeild liðsins.

Ernst Otton Willimowski, Ezi (gælunafn), (fæddur Ernest Otto Prandella) (23. júní 1916 - 30. ágúst 1997) var pólsk/þýskur knattspyrnumaður og einn mesti markaskorari sögunnar.

Ævi og keppnisferill[breyta | breyta frumkóða]

Ernst Willimowski í keppni árið 1937.

Willimowski fæddist í Katowice í Slesíu sem þá tilheyrði Þýska keisaraveldinu. Eftir að héraðið varð hluti að Póllandi árið 1922 varð hann pólskur ríkisborgari. Foreldrar hans voru Þjóðverjar og faðirinn, Ernst-Roman Prandella, féll í fyrri heimsstyrjöldinni. Móðir hans, Paulina, kvæntist á ný pólskum manni sem ættleiddi drenginn og tók hann þá upp hið pólska nafn sitt. Heima fyrir talaði Willimowski þýsku og svaraði yfirleitt spurningunni um hvort hann liti fremur á sig sem Pólverja eða Þjóðverja á þá leið að hann væri Slésíubúi.

Hann hóf að æfa knattspyrnu með liði þýskra íbúa Katowice, en komst á mála hjá liði í efstu deild rétt tæplega átján ára gamall og sama leyti lék hann sinn fyrsta landsleik. Hann lék alls 22 landsleiki fyrir Pólland á árunum 1934-39 og skoraði í þeim 21 mark. Eftirminnilegastur þeirra leikja var á móti Brasilíumönnum á HM í Frakklandi 1938 þar sem hann skoraði fjögur mörk og fiskaði vítaspyrnu að auki. Allt kom þó fyrir ekki og Pólverjar töpuðu 6:5. Síðasti landsleikur hans var í minnisstæðum sigri gegn afar sterku liði Ungverja árið 1939, fjórðum dögum áður en seinni heimsstyrjöldin braust út.

Eins og flestir aðrir íbúar austur-Slesíu, tók Willimowski upp þýskan ríkisborgararétt eftir hernám Þjóðverja. Fyrir vikið mátti hann halda áfram að leika knattspyrnu, en nasistar bönnuðu Pólverjum þátttöku í keppnisíþróttum. Engu að síður treystu stjórnendur hernámsliðsins Willimowski varlega, þar sem hann hafði fyrir stríð leikið með pólskum félagsliðum en ekki bara liðum þýska minnihlutans. Móðir hans var sett í fangabúðir en komst lífs af úr þeim.

Þegar leið á stríðið flutti Willimowski sig um set og gekk til liðs við 1860 München og varð bikarmeistari árið 1942. Undir lok stríðsins var hann skráður í herinn, en fékk þó að leika knattspyrnu samhliða herþjónustu. Hann lék átta leiki og skoraði heil þrettán mörk fyrir þýska landsliðið frá 1941-42, en í kjölfarið var starfsemi landsliðsins hætt vegna stríðsins.

Í stríðslok litu pólsk stjórnvöld á Willimowski sem svikara og var honum óheimilt að snúa aftur til heimaslóða sinna. Hann settist því að í Þýskalandi, lék fyrir fjölda liða en sinnti jafnframt ýmsum störfum enda hafði hreinræktuð atvinnumennsta ekki verið tekin upp í landinu. Hann keppti vel fram yfir fertugt sem var fáheyrt í þá tíð.

Willimowski er almennt talinn einn mesti markaskorari knattspyrnusögunnar og áætlaði knattspyrnublaðið Kicker að hann hefði skorað 1.175 mörk á ferlinum. Útilokað er að sannreyna þá tölu sem inniheldur ýmsa vináttu- og æfingarleiki. Ef aðeins er horft til opinberra kappleikja er áætlað að talan sé 554 mörk, sem engu að síður skipar honum ofarlega á lista yfir markahæstu menn.

Heimildir[breyta | breyta frumkóða]