Alþýðufylkingin
| Alþýðufylkingin | |
|---|---|
 | |
| Fylgi | 0,2% |
| Formaður | Þorvaldur Þorvaldsson |
| Stofnár | 2013 |
| Stjórnmálaleg hugmyndafræði |
Sósíalismi, náttúruverndarstefna, friðarstefna, kvenfrelsisstefna. |
| Einkennislitur | Rauður |
| Vefsíða | althydufylkingin.is |
Alþýðufylkingin er íslensk stjórnmálahreyfing sem stofnuð var í Friðarhúsi í Reykjavík 12. janúar árið 2013.[1] Flokkurinn er róttækur vinstri flokkur sem ætlar sér að vera „baráttutæki íslenskrar alþýðu til að bæta hag sinn með því að heimta sitt úr höndum auðstéttarinnar“.[2] Alþýðufylkingunni hefur verið stillt upp sem klofningsframboði úr Vinstri grænum. Forkólfar Alþýðufylkingarinnar, Þorvaldur Þorvaldsson og Vésteinn Valgarðsson voru í stjórn og flokksráði Vinstri grænna en sögðu sig úr flokknum vegna óánægju með hann og ríkisstjórnina. Framboðið var svar við eftirspurn eftir stjórnmálaafli sem staðsetur sig vinstra megin við Vinstri græna.[3]
Flokkurinn bauð fram í alþingiskosningunum 2013, 2016 og 2017. Auk þess í borgarstjórnarkosningunum 2014 og 2018. Í öll þessi skipti hlaut flokkurinn minna en 0,5% atkvæða. Á landsfundi flokksins árið 2018 var samþykkt að stefna ekki lengur á framboðum til alþingis og sveitarstjórnar. Árið 2021 var listabókstafur flokksins gerður óvirkur. Auk þess hefur lítið sem ekkert starf verið innan flokksins síðan árið 2022.
Stefnumál
[breyta | breyta frumkóða]Alþýðufylkingin berst skilyrðislaust gegn aðild Íslands að Evrópusambandinu á þeim forsendum að þar ráði auðvaldsskipulag og frjálshyggja ríkjum, og Íslendingar eigi heldur að standa vörð um pólitískt og efnahagslegt fullveldi þjóðarinnar.[4] Flokkurinn mælir með úrsögn Íslands úr Atlantshafsbandalaginu og vill þess í stað að landið beiti sér í þágu friðar og réttlætis á alþjóðavettvangi.
Alþýðufylkingin hefur það að markmiði að jöfnuður og jafnrétti verði raunverulegar stoðir samfélagsins. Til þess þyrfti að efla lýðræði og auka vægi hins félagslega í hagkerfinu á kostnað markaðsvæðingar, en þá verði hægt að reisa velferðarkerfið við og styrkja alla innviði félagskerfisins.
Með félagsvæðingu er ekki aðeins átt við ríkisrekstur eða annað félagslegt eignarhald heldur verði markmið rekstrarins annað og víðtækara en bókhaldslegur hagnaður: Hagur almennings og samfélagsins í heild verði í öndvegi, viðkomandi starfsemi lúti lýðræðislegum ákvörðunum og stefnumörkun og enginn geti haft hana sér að féþúfu.“
— Stefnuskrá Alþýðufylkingarinnar.
Markmiðið verði að heilbrigðisþjónusta og menntun verði án endurgjalds og séu samfélagsleg verðmæti fremur en markaðsvara. Forsenda þess er að létta oki fjármálastarfsemi og að kröfunni um sífellda útþenslu verði létt af hagkerfinu.
Þá segir flokkurinn að einkarekstur eigi rétt á sér í verðmætaskapandi framleiðslu og þjónustu sem teljist ekki til innviða samfélagsins. Atvinnuvegir eigi að vera fjölbreyttir samfara því sem þeir uppfylli þarfir þjóðfélagsins.
Alþýðufylkingin berst fyrir því að auðlindir lands og sjávar verði óframseljanleg sameign þjóðarinnar svo hagnaðurinn skili sér í bættum lífskjörum hennar. Hófleg nýting skuli vera höfð að leiðarljósi og stórauknu fé skuli veitt til þess að auka landgæði og vinna gegn náttúruspjöllum. Varast skal of mikla samþjöppun og einokun bæði hvað landbúnaðinn og ferðaþjónustuna varðar til að koma í veg fyrir rýrnun á landsgæðum.
Framboð
[breyta | breyta frumkóða]Alþingiskosningar 2013
[breyta | breyta frumkóða]Alþýðufylkingin fékk úthlutað listabókstafnum R[5] og bauð fram framboðslista í alþingiskosninganna 2013 í Reykjavíkurkjördæmum norður og suður. Þótt flokkurinn hafi ekki fengið mann kjörinn inn á Alþingi, sögðust félagsmenn stefna á áframhaldandi samstarf og vera komnir til þess að vera.[6] Atkvæði flokksins voru 118, eða um 0,04% af heildarfjölda atkvæða.
Sveitarstjórnarkosningar 2014
[breyta | breyta frumkóða]Í mars 2014 lýsti Alþýðufylkingin yfir framboði í sveitarstjórnarkosningum og bauð um vorið fram í Reykjavík, þar sem Þorvaldur Þorvaldsson leiddi listann.[7] Hlaut framboðið 219 atkvæði, eða um 0,4%.
Alþingiskosningar 2016
[breyta | breyta frumkóða]Í september 2016 tilkynnti Alþýðufylkingin að hún mundi bjóða fram til Alþingis sama haust. Bauð flokkurinn fram í öllum kjördæmunum nema norðvesturkjördæmi. Hlaut hann samanlagt 575 atkvæði, eða um 0,3%. Mest var fylgið í norðausturkjördæmi, 0,9%.
Alþingiskosningar 2017
[breyta | breyta frumkóða]Í Alþingiskosningunum haustið 2017 bauð Alþýðufylkingin fram í fjórum kjördæmum. Reykjavíkurkjördæmi norður, Reykjavíkurkjördæmi suður, Norðausturkjördæmi og Suðvesturkjördæmi.
Sveitarstjórnarkosningar 2018
[breyta | breyta frumkóða]Í sveitarstjórnarkosningunum 2018 bauð Alþýðufylkingin fram í Reykjavík.[8] Hún fékk 149 atkvæði.
Aukalandsfundur 2018
[breyta | breyta frumkóða]Flokkurinn hélt aukalandsfund 6.-7. október 2018. Þar var Þorvaldur Þorvaldsson endurkjörinn formaður en varaformaðurinn, Vésteinn Valgarðsson, sté til hliðar og Þorvarður B. Kjartansson var kjörinn varaformaður. Fleiri breytingar urðu á forystunni, en auk þeirra ákvað flokkurinn að stefna ekki að nýju framboði til Alþingis eða sveitarstjórna á næstunni, heldur einbeita sér þess í stað að grasrótarstarfi og starfi með frjálsum félagasamtökum.
Formenn og varaformenn
[breyta | breyta frumkóða]| Formaður | Kjörinn | Hætti |
|---|---|---|
| Þorvaldur Þorvaldsson | 12. janúar 2013 | Enn í embætti |
| Varaformaður | Kjörinn | Hætti |
|---|---|---|
| Vésteinn Valgarðsson | 12. janúar 2013 | 7. október 2018 |
| Þorvarður B. Kjartansson | 7. október 2018 | Enn í embætti |
Tenglar
[breyta | breyta frumkóða]Heimildir
[breyta | breyta frumkóða]- ↑ „Stofnyfirlýsing Alþýðufylkingarinnar“ Geymt 5 mars 2016 í Wayback Machine, Alþýðufylkingin Geymt 20 nóvember 2016 í Wayback Machine 13. janúar 2013. [Skoðað 9. mars 2013].
- ↑ „Stefnuskrá Alþýðufylkingarinnar“ Geymt 18 janúar 2015 í Wayback Machine, Alþýðufylkingin Geymt 20 nóvember 2016 í Wayback Machine, [Skoðað 12. mars 2013].
- ↑ „Auðstéttin fái ekki að arðræna fólk“, RÚV 13. mars 2013. [Skoðað 10. apríl 2013]
- ↑ „Alþýðufylkingin (“The People’s Front of Iceland”) Interviewed“, The Reykjavík Grapevine 5. mars 2013. [Skoðað 10. apríl 2013]
- ↑ „Fimm nýir listabókstafir“ Geymt 3 apríl 2016 í Wayback Machine, Kosningavefur Innanríkisráðuneytisins Geymt 9 nóvember 2012 í Wayback Machine 8. mars 2013. [Skoðað 12. mars 2013].
- ↑ „Fundur í kvöld -- góður mórall“ Geymt 5 mars 2016 í Wayback Machine, Alþýðufylkingin Geymt 20 nóvember 2016 í Wayback Machine 9. apríl 2013. [Skoðað 10. apríl 2013].
- ↑ „Leysa samfélagsleg mál án þess að auðmenn geti haft þau að féþúfu“ Geymt 28 mars 2014 í Wayback Machine, 'DV' [Skoðað 28. mars 2014].
- ↑ [hhttp://www.ruv.is/frett/althydufylkingin-bydur-fram-i-reykjavik Alþýðufylkingin býður fram í Reykjavík], vuv.is (Skoðað 12. maí 2018).