Valur Gunnarsson

Úr Wikipediu, frjálsa alfræðiritinu
Jump to navigation Jump to search

Valur Snær Gunnarsson (f. 26. ágúst 1976) er íslenskur rithöfundur, blaðamaður, ritstjóri og fyrrum söngvari rokkhljómsveitarinnar Ríkið sem flutti pólitískt rokk.

Árið 2000 gaf hann út sólóplötu, Reykjavík er köld, þar sem hann söng lög eftir Leonard Cohen í eigin þýðingu. Árið 2003 gaf Ríkið út fyrstu og einu plötu sína, Seljum allt, með textum eftir Val. Valur var þekktur fyrir óvenjulega sviðsframkomu þar sem hann leitaði sér fyrirmynda í pönkinu og meðal óheflaðra rokkara. Þegar Valur kom fram ásamt Ríkinu var hann jafnan klæddur hermannajakka, nokkrum númerum of litlum.

Valur var ritstjóri Reykjavík Grapevine til ársins 2005 og hefur eftir það fengist við skriftir og blaðamennsku, m.a. á DV og Fréttablaðinu. Árið 2004 gaf hann út ljóðasafn á ensku, A Fool for Believing (Owings Mills, Md.: Watermark, 2004).

Hann hefur gefið út tvær skáldsögur, Konungur norðursins: Harmsaga Ilkka Hampurilainen. 1 sem kom út 2007 (Mál og menning) og Síðasti elskhuginn sem kom út 2013 (Ormstunga), og hafa þær báðar fengið góða dóma. Í 2015 gaf hann út stutta ævisögu, Paul Luchterhand 1873-1923, og árið 2017 gaf hann út Örninn og fálkinn: Skáldsaga (Mál og menning).