Skilaboðaskjóðan
Skilaboðaskjóðan er ævintýri fyrir börn eftir Þorvald Þorsteinsson sem kom út árið 1986 og naut mikilla vinsælda. Sagan segir frá Putta og Möddumömmu sem eiga heima í Ævintýraskóginum þar sem öll ævintýrin gerast. Þegar Nátttröllið rænir Putta til að breyta honum í tröllabrúðu, sameinast allir íbúar skógarins um að bjarga honum áður en sólin sest. En nornin, úlfurinn og stjúpan vilja ekki vera með og þá eru góð ráð dýr.
Þorvaldur skrifaði leikgerð af sögunni fyrir söngleik sem var frumsýndur á stóra sviði Þjóðleikhússins í nóvember árið 1993. Leikstjóri var Kolbrún Halldórsdóttir, en Jóhann G. Jóhannsson, tónlistarstjóri Þjóðleikhússins, samdi tónlist fyrir verkið við texta Þorvaldar. Í aðalhlutverkum voru Margrét Pétursdóttir, Harpa Arnardóttir og Jón Stefán Kristjánsson. Söngleikurinn vakti mikla athygli og fékk góða dóma.[1] Vorið 1994 kom út geisladiskur með tónlistinni í flutningi leikara og hljómsveitar leikhússins.
Skilaboðaskjóðan var aftur sett á svið í Þjóðleikhúsinu í nóvember 2007 í leikstjórn Gunnars Helgasonar. Í aðalhlutverkum voru Ólafía Hrönn Jónsdóttir, Árni Beinteinn Árnason og Hrafn Bogdan Haraldsson, og Rúnar Freyr Gíslason. Í september 2013 flutti Sinfóníuhljómsveit Íslands verkið í tónleikauppfærslu ásamt fjórum einsöngvurum og kór.[2]
Söngleikurinn hefur líka verið settur upp af áhugaleikhúsum víða um land.[3][4]
Tilvísanir
[breyta | breyta frumkóða]- ↑ Þórdís Gísladóttir (1.9.2007). „Leyst frá skjóðunni“. Börn og menning. bls. 36.
- ↑ „Skilaboðaskjóðan eftir Þorvald Þorsteinsson“. Þjóðleikhúsið. 2. ágúst 2020.
- ↑ Sigrún Pétursdóttir (10. október 2022). „Skilaboðaskjóðan sett á svið“. Bændablaðið.
- ↑ „Æfingar hafnar á Skilaboðaskjóðunni á Selfossi“. Dsf.is. 29. janúar 2026.