Paul Manafort

Úr Wikipediu, frjálsa alfræðiritinu
Jump to navigation Jump to search
Paul Manafort á landsþingi Repúblikanaflokksins árið 2016.

Paul Manafort (f. 1. apríl 1949) er bandarískur lögfræðingur, pólítískur ráðgjafi og umboðsmaður (e lobbyist) sem hefur starfað fyrir Repúblíkana og íhaldssöm hagsmunasamtök og þrýstihópa. Manafort starfaði sem ráðgjafi kosningastjórna Gerald Ford, Ronald Reagan, George H. W. Bush og Bob Dole. Hann var formaður kosningastjórnar Donald Trump frá júní til ágúst 2016.[1] Árið 2017 var Manafort ákærður fyrir að hafa hindrað framgang réttvísinnar og brot á lögum um áróður fyrir erlendar ríkisstjórnir í tengslum við rannsókn Robert Mueller sérstaks saksóknara í rannsókn þingsins á afskiptum rússneskra stjórnvalda af forsetakosningunum 2016. Í kjölfarið gerði Trump sem minnst úr hlut Manafort í kosningabaráttu sinni.[1] Manafort var dæmdur til alls sjö og hálfs árs fangelsisvistar

Black, Manafort and Stone[breyta | breyta frumkóða]

Lengst af starfsferils síns starfaði Manafort sem pólítískur umboðsmaður. Árið 1980 stofnaði hann ásamt Charlie Black og Roger Stone ráðgjafafyrirtækið Black, Manafort and Stone.[2] Black, Manafort And Stone sérhæfði sig í að koma á tengslum milli bandaríska stjórnmálamanna og erlenda þjóðhöfðingja, þar á meðal einræðisherra eins og Mobutu Sese Seko í Saír, (nú Lýðstjórnarlýðveldið Kóngo), Ferdinand Marcos á Filipseyjum og Jonas Savimbi í Angóla. Fyrirtækið þrýsti á þingmenn fyrir hönd umbjóðenda sinna sem óskuðu bæði eftir aðstoð og afléttingu efnahagslegra eða diplómatískra þvingana, auk þess að aðstoðaða þá við ímyndarsköpun í Bandarískum fjölmiðlum.[2]

Í október 2017 voru Manafort og samstarfsmaður hans, Rick Gates, ákærðir fyrir brot á lögum um pólítískan áróður fyrir erlendar ríkisstjórnir. Ákæran var gefin út í tengslum við rannsókn Robert Mueller, sérstaks saksóknara í rannsókn þingsins á afskiptum rússneskra stjórnvalda af forsetakosningunum 2016 og snertu störf Manafort fyrir Viktor Janúkóvitsj, fyrrverandi forseti Úkraínu en hann naut stuðnings Rússlands.[1]

Rannsókn Roberts Mueller[breyta | breyta frumkóða]

Ákærur í alls 23 liðum voru lagðar fram á hendur Manafort í tveimur alríkisdómstólum árið 2017 og 18.[3] Að auki kærði fylkissaksóknari New York Manafort fyrir umboðssvik í fasteignaviðskiptum og önnur efnahagsbrot.

Alríkisdómstól Austur Virginíu tók fyrir 18 ákæruatriði sem lutu að umfangsmiklum efnahags- og skattabrotum, fyrir að hafa vantalið tekjur og leynt erlendum bankareikningum. Ákæruvaldið fór fram á að Manafort yrði dæmdur til 20-24 ára fangelsisvistar yrði hann fundinn sekur. Í ágúst 2018 var Manafort fundinn sekur um skattsvik og önnur efnahagsbrot í alls átta ákæruliðum.[1] Hann játaði sekt í hinum tíu.[4]

Í aðskildu máli fyrir Alríkisdómstól District of Columbia í Washington D.C. þar sem Manafort var ákærður í átta liðum fyrir peningaþvætti, brot á lögum um umboðsmenn erlendra ríkisstjórna og fyrir að hafa hindrað framgang réttvísinnar með því að bera ljúgvitni og hafa áhrif á framburð annarra vitna. Manafort gekkst við tveimur af fimm ákæruatriðum og hét fullri samvinnu með rannsókn Mueller gegn vægari dómi.[5] Í nóvember 2018 sakaði Mueller Manafort hins vegar um að hafa svikið samninginn með því að hafa visvitandi gefið rangar upplýsingar og logið til um samband sitt við Konstantin Kilimnik, sem bandarísk stjórnvöld telja útsendara rússneskra stjórnvalda. Samningur Manafort við dómstólinn um vægari refsingu var því ógiltur 13. febrúar.[6]

Þann 7 mars 2019, dæmdi Alríkisdómstóll Austur Virginíu Manafort til 47 mánaða fangelsisvistar, að frádregnum 9 mánuðum sem hann hafði þegar setið í gæsluvarðhaldi.[7] Þann 13. mars 2019 var hann að auki dæmdur til 73 mánaða fangelsisvistar af Alríkisdómstól District of Columbia. Af þeim skulu 30 mánuðir afplánaðir samhliða fyrri dómnum. Alls var Manafort því dæmdur til sjö og hálfs árs fangelsisvistar í tengslum við rannsókn Robert Mueller.[8] Í febrúar 20189 var Manafort ennfremur sviptur lögfræðiréttindum sínum ævilangt.[9]

Manafort var látinn laus úr fangelsi 13. maí 2020 í ljósi hættunnar sem honum stafaði af Covid-19 innan fangelsisveggja vegna aldurs, en hann er 71 árs. Donald Trump náðaði Manafort þann 24. desember sama ár, á síðasta mánuði sínum í forsetaembætti.[10]

Tilvísanir[breyta | breyta frumkóða]

  1. 1,0 1,1 1,2 1,3 „Hver er Paul Manafort? Hátt fall mannsins á bak við tjöldin - Vísir“. visir.is. Sótt 28. október 2020.
  2. 2,0 2,1 Foer, Story by Franklin. „Paul Manafort, American Hustler". The Atlantic. ISSN 1072-7825 Skoðað 28. október 2020.
  3. „Read the indictment against Paul Manafort - The Boston Globe“. BostonGlobe.com. Sótt 28. október 2020.
  4. CNN, Katelyn Polantz. „Paul Manafort pleads guilty and agrees to cooperate with Mueller investigation“. CNN. Sótt 17. nóvember 2020.
  5. Matthews, Dylan (14. september 2018). „Why Paul Manafort pleaded guilty to "conspiracy against the United States". Vox (enska). Sótt 28. október 2020.
  6. Hsu, Spencer S.. „Federal judge finds Paul Manafort lied to Mueller probe about contacts with Russian aide". Washington Post. (en-US) ISSN 0190-8286 Skoðað 17. nóvember 2020.
  7. „Paul Manafort sentenced to less than 4 years in prison after judge praises 'otherwise blameless life'. NBC News (enska). Sótt 17. nóvember 2020.
  8. Breuninger, Kevin (13. mars 2019). „Paul Manafort gets additional 43 months in second Mueller sentence after ex-Trump campaign boss says he's 'sorry'. CNBC (enska). Sótt 17. nóvember 2020.
  9. Thomsen, Jacqueline (9. maí 2019). „DC court disbars Manafort over criminal convictions“. TheHill (enska). Sótt 28. október 2020.
  10. Ævar Örn Jósepsson (24. desember 2020). „Trump náðar Manafort, Stone og tengdaföður Ivönku“. RÚV. Sótt 24. desember 2020.