Park Chung-hee

Park Chung-hee
박정희
Park árið 1970.
Forseti Suður-Kóreu
Í embætti 17. desember 1963 – 26. október 1979
Forsætisráðherra	Kim Hyun-chul Choi Tu-son Chung Il-kwon Paik Too-chin Kim Jong-pil Choi Kyu-hah
Forveri	Yun Posun
Eftirmaður	Choi Kyu-hah (starfandi)
Persónulegar upplýsingar
Fæddur	14. nóvember 1917 Kameo, japönsku Kóreu (nú Suður-Kóreu)
Látinn	26. október 1979 (61 árs) Seúl, Suður-Kóreu
Dánarorsök	Myrtur
Stjórnmálaflokkur	Demókratískir repúblikanar
Maki	Kim Ho-nam (g. 1936; skilin 1950); Yuk Young-soo (g. 1950; d. 1974)
Trúarbrögð	Búddisti
Börn	Park Jae-ok, Park Geun-hye, Park Geun-ryoung, Park Ji-man
Háskóli	Japanska hernaðarakademían; kóreska hernaðarakademían
Starf	Hermaður, stjórnmálamaður
Undirskrift

Park Chung-hee (14. nóvember 1917 – 26. október 1979) var suðurkóreskur stjórnmálamaður sem var forseti Suður-Kóreu frá árinu 1963 þar til hann var ráðinn af dögum árið 1979. Hann tók við embætti forseta eftir að hafa í fyrstu ráðið yfir herstjórn landsins eftir valdarán þann 16. maí 1961. Fyrir forsetatíð sína var hann formaður herstjórnarinnar frá 1961 til 1963 og hafði þar áður verið herforingi í suðurkóreska hernum.

Valdarán Parks batt enda á bráðabirgðaríkisstjórn annars Kóreulýðveldisins og kjör hans til forseta árið 1963 kom á fót þriðja Kóreulýðveldinu. Árið 1972 kom Park á herlögum og umbreytti stjórnarskránni til að gera hana mun gerræðislegri. Þar með var stofnað fjórða Kóreulýðveldið.

Eftir að hafa lifað af margar morðtilraunir, þar af tvær af hálfu Norður-Kóreumanna, var Park ráðinn af dögum þann 26. október 1979 af návini sínum og bandamanni, Kim Jae-gyu, formanni suðurkóresku leyniþjónustunnar. Kim myrti einnig Cha Ji-chul, foringja öryggisþjónustu forsetans. Eftir morðið var hann handtekinn ásamt vitorðsmönnum sínum, pyntaður, sakfelldur og tekinn af lífi á meðan Choi Kyu-hah forsætisráðherra gerðist bráðabirgðaforseti. Hershöfðinginn Chun Doo-hwan var fljótur að ná völdum eftir að öryggismálastjórn hans var falið að rannsaka óvænt morðið á forsetanum. Enn er óvíst hvort morðið var skyndiákvörðun, stundarbrjálæði eða undirbúið með fyrirvara og deilt er um ásetning Kims Jae-gyu.

Hagvöxtur hélt áfram eftir dauða Parks og lýðræði var að endingu komið á. Sumir síðari forsetar voru fyrrverandi andófsmenn sem höfðu verið handteknir í stjórnartíð Parks. Park nýtur enn vinsælda meðal suðurkóresks almennings og hefur gjarnan verið kallaður vinsælasti forseti landsins en arfleifð hans er þó umdeild. Aðdáendur hans þakka honum fyrir að viðhalda hagvexti eftir Kóreustríðið og nútímavæða Suður-Kóreu en gagnrýnendur líta á hann sem einræðisherra sem bældi niður alla andstöðu með ofbeldi og hygldi efnahaginum og samfélagslegum stöðugleika á kostnað mannréttinda.

Forsetabókasafn Parks Chung-hee var opnað árið 2012. Þann 25. febrúar árið eftir var dóttir Parks, Park Geun-hye, kjörin fyrsti kvenforseti Suður-Kóreu og gegndi því embætti þar til hún var svipt embætti í kjölfar hneykslismála árið 2017.

Tilvísanir

Fyrirrennari: Yun Posun

Forseti Suður-Kóreu (17. desember 1963 – 26. október 1979)

Eftirmaður: Choi Kyu-hah (starfandi)