Latínuletur

Útbreiðsla latínuleturs:

  Latínuletur er eina opinbera skrifletrið.

  Latínuletur er notað með öðru skrifletri.

  Latínuletur er ekki notað.

Latínuletur er stundum notað á gráum svæðum við ritun óopinberra annarra mála, eins og frönsku í Marokkó og ensku í Egyptalandi, og í umritunarkerfum, eins og pinyin í Kína.

Latínuletur, latnesk skrift eða rómverskt letur er skrifletur sem byggist á latneska stafrófinu, sem aftur er dregið af einni útgáfu gríska stafrófsins. Etrúrar þróuðu etrúskt letur byggt á grísku letri sem var notað í Magna Graecia á Suður-Ítalíu og Rómverjar gerðu svo sína eigin útgáfu af því. Til eru mörg ólík latnesk stafróf sem notast við latínuletur, en bæta við og sleppa ákveðnum táknum, og hafa önnur hljóðgildi en klassíska latneska stafrófið.

Alþjóðlega hljóðstafrófið byggist á latínuletri. Staðallinn ISO 646 inniheldur 26 algengustu leturtáknin í latínuletri (þau sömu og mynda enska stafrófið).

Latínuletur er undirstaða fleiri stafrófa en nokkuð annað skrifletur. Það er líka útbreiddasta skrifletur heims og er notað í málum Vestur- og Mið-Evrópu, á flestum stöðum í Afríku sunnan Sahara, Norður- og Suður-Ameríku og Eyjaálfu, auk fleiri staða.