Samtökin 22

Samtökin 22
Stofnun	2020 (2020)
Forstöðumaður	Eldur Ísidór Deville
Vefsíða	https://www.samtokin22.is/

Samtökin 22 eru íslensk félagasamtök sem lýsa sjálfum sér sem hagsmunasamtökum homma og lesbía. Þar sem samtökin viðurkenna ekki tilvist trans fólks og hafa beitt sér gegn aukinni vernd þeirra og fræðslu um trans málefni líta gagnrýnendur þeirra á þau sem transfóbíska hreyfingu. Samtökin sjálf hafna slíkum ásökunum.

Söguágrip

Samtökin 22 voru upphaflega stofnuð árið 2020 að undirlagi Elds Ísidórs Deville, Ivu Marínar Adrichem og fleiri sem íslensk systursamtök bresku samtakanna LGB Alliance. LGB Alliance eru samtök sem klufu sig úr Stonewall, hagsmunasamtökum hinsegin fólks í Bretlandi, vegna óánægju með jákvæða afstöðu samtakanna til trans fólks. Samtökin voru stofnuð undir nafninu LGB teymið en breyttu síðar nafninu í Samtökin 22, sem samsvarar nafni Samtakanna '78, stærstu hagsmunasamtaka hinsegin fólks á Íslandi. Þrátt fyrir líkindin með nöfnum hreyfinganna er ekki um að ræða tengd félög.

Samtökin 22 vöktu fyrst þjóðarathygli á Íslandi í nóvember 2022 þegar þau skiluðu inn umsögn til Alþingis um lagafrumvarp þingkonunnar Hönnu Katrínar Friðriksson um bann við bælingarmeðferðum á hinsegin fólki. Í umsögninni sögðust samtökin fagna fyrirætlunum um að banna bælingarmeðferðir gegn samkynhneigð en mótmæltu því að bælingar á kynvitund og kyntjáningu yrðu einnig bannaðar. Í þingræðu þann 15. nóvember 2022 gagnrýndi Daníel E. Arnarsson, varaþingmaður Vinstrihreyfingarinnar – græns framboðs og framkvæmdastjóri Samtakanna '78, það að tekið hefði verið við umsögn Samtakanna 22 um frumvarpið og sagði samtökin tengjast erlendum samtökum sem væru á lista yfir haturssamtök. Samtökin 22 brugðust við ummælum Daníels með því að kvarta til forseta Alþingis yfir meintum brotum hans gegn siðareglum þingsins. Kvörtun þeirra var vísað frá í desember sama ár.

Í apríl árið 2023 skrifuðu tæplega 300 samkynhneigðir Íslendingar undir grein sem birt var á vefmiðlinum Vísi þar sem Samtökin 22 voru fordæmd og því mótmælt að þau kölluðu sig hagsmunasamtök samkynhneigðra. Undirrituð að greininni sögðu ljóst að starf Samtakanna 22 „[snerist] ekki um réttindabaráttu eða hagsmunagæslu samkynhneigðra heldur baráttu gegn réttindum og hagsmunum annarra hópa“.

Í september 2023 tilkynnti Reykjavíkurborg Samtökin 22 til lögreglu eftir að Eldur Deville og tveir aðrir meðlimir samtakanna komu óboðnir inn í Lang­holts­skóla. Að eigin sögn voru þeir komnir til að krefjast svara vegna ábendingar foreldra um að plaköt með upplýsingum um BDSM væru á veggjum skólans. Þeir tóku upp myndbönd af skólastarfsfólki á meðan þeir kröfðu það svara en var síðan vísað burt.