Knattspyrnudeild Vestra

Úr Wikipediu, frjálsa alfræðiritinu
Jump to navigation Jump to search
Knattspyrnudeild Vestra
Fullt nafn Knattspyrnudeild Vestra
Gælunafn/nöfn Djúpmenn
Stytt nafn Vestri
Stofnað 1986 sem Boltafélag Ísafjarðar
1988 sem BÍ88
2006 sem BÍ/Bolungarvík
2016 sem Vestri
Leikvöllur Torfnesvöllur
Stærð 800
Stjórnarformaður Samúel Samúelsson
Deild 2. deild karla
2019 2. sæti
Heimabúningur
Útibúningur

Knattspyrnudeild Vestra er knattspyrnudeild Íþróttafélagsins Vestra í Ísafjarðarbæ.[1] Félagið var stofnað árið 1986 sem Boltafélag Ísafjarðar. Árið 1988 lagðist meistaraflokkur karla hjá Íþróttabandalagi Ísafjarðar niður og færðust flestir leikmennirnir yfir til Boltafélagsins. Árið eftir fylgdi meistaraflokkur kvenna hjá ÍBÍ með og hafði Boltafélagið því tekið við af ÍBÍ sem stærsta knattpsyrnuliðið á Vestfjörðum. Á árunum 2006 til 2016 tefldi það fram sameiginlegu liði með Ungmennafélagi Bolungarvíkur undir heitinu BÍ/Bolungarvík.[2] Árið 2016 gekk Boltafélagið inn í nýstofnað Íþróttafélagið Vestra og varð að knattspyrnudeild þess.[3][4][5]

Meistaraflokkur karla[breyta | breyta frumkóða]

Saga[breyta | breyta frumkóða]

Boltafélag Ísafjarðar hóf keppni í Vestfjarðariðli Íslandsmótsins í knattspyrnu sumarið 1986. Í kappliði þess var meðal annars að finna ýmsar gamlar kempur úr liði ÍBÍ frá fyrri árum. Fyrstu tvö árin hafnaði liðið um miðja deild en allar forsendur breyttust árið 1988 þegar meistaraflokkur ÍBÍ var lagður niður og leikmennirnir gengu allir til liðs við Boltafélagið. Um leið tók félagið upp nafnið BÍ ´88, sem gaf til kynna að litið væri svo á að 1988 væri nýtt stofnár félagsins.

BÍ ´88 fór upp um deild í fyrstu tilraun og varð deildarmeistari eftir sigur á Austra Eskifirði í úrslitaleik. Við tók þriggja ára dvöl í þriðju efstu deild. Fyrsta árið tókst Ísfirðingum að halda sæti sínu sem þótti vel að verki staðið þar sem fallið var frá því að keppa í tveimur landshlutariðlum og liðum fækkað í tíu. Árið eftir var BÍ ´88 einu sæti frá því að falla eftir æsilegt einvígi við Einherja frá Vopnafirði. Sumarið 1991 gekk hins vegar allt að óskum og Ísafjarðarliðið hafnaði í öðru sæti á eftir Leiftri Ólafsfirði og var komið í næstefstu deild.

Sjöunda sætið varð niðurstaðan sumarið 1992, en róðurinn reyndist þyngri á öðru ári félagsins í deildinni og haustið 1993 höfnuðu Ísfirðingar í næstneðsta sæti, stigi á eftir ÍR-ingum og féllu niður um deild. Eftir bærilega frammistöðu sumarið 1994 lentu Ísfirðingar í miklum vandræðum á sínu seinna ári í þriðju deildinni og enduðu sumarið 1995 í neðsta sæti og voru á ný komnir í neðstu deild.

Það voru Haukar sem féllu með Ísfirðingum og árið eftir var það Hafnarfjarðarliðið sem sló BÍ ´88 út úr úrslitakeppni fjórðu deildar. Þetta reyndist síðasta BÍ ´88 sem var komið í fjárhagslegt þrot. Félagið sendi því ekki lið til keppni sumarið 1997, en leikmenn gengu flestir til liðs við Knattspyrnufélagið Erni sem hóf þátttöku á Íslandsmóti árið áður.

Ernir komust í úrslitakeppni deildarinnar árið 1997 en féllu þar úr leik fyrir Ármenningum. Árið 1998 gengu nokkrir lykilmenn úr Ísafjarðarliðinu til liðs við Bolvíkinga, sem gerðu atlögu að því að komast upp um deild. Það mistókst naumlega en í kjölfarið kviknuðu umræður um að sameina kapplið bæjanna tveggja. Með sameiningu meistaraflokks Ungmennafélags Bolungarvíkur og Knattspyrnufélagsins Ernis sumarið 1999 varð til KÍB, Knattspyrnufélag Ísafjarðar og Bolungarvíkur. Hið sameinaða lið komst upp um deild strax í fyrstu tilraun eftir að hafa lent í öðru sæti á eftir Aftureldingu.

Tilveran í næstu deild fyrir ofan reyndist erfiðari. KÍB hélt sér naumlega uppi sumarið 2000 en kolféll árið eftir með markatöluna 27:71. Í kjölfarið var ákveðið að slíta samstarfi félaganna tveggja. Bolvíkingar sendu sitt eigið lið til keppni sumarið 2002 og Boltafélag Ísafjarðar var endurvakið. Árin 2002-5 hafnaði BÍ einatt um eða fyrir neðan miðju í sínum riðli í deildinni.

Rýr uppskera Vestfjarðaliðanna varð til þess að ákveðið var að ráðast í nýja sameiningartilraun fyrir sumarið 2006. BÍ/Bolungarvík, sem stundum var kallað Djúpmenn eða einfaldlega „skástrikið“ af gárungum byrjaði rólega, en sumarið 2008 tókst liðinu að ná 2. sæti í deildinni og komast upp í þriðju efstu deild. Sumarið 2010 komst BÍ/Bolungarvík upp í næstefstu deild og munaði þar miklu um 19 mörk Andra Rúnars Bjarnasonar, markakóngs deildarinnar.

Það vakti mikla athygli þegar nýliðar BÍ/Bolungarvíkur tilkynntu ráðningu nýs þjálfara fyrir sumarið 2011. Guðjón Þórðarson, fyrrum landsliðsþjálfari Íslands, sneri þá aftur til heimalandsins eftir margra ára dvöl í útlöndum. Liðið var í efri hluta deildarinnar stóran hluta tímabilsins, en hafnaði að lokum í sjötta sæti. Betur gekk í bikarkeppni KSÍþar sem Vestfjarðaliðið sló út Íslandsmeistara Breiðabliks og Þrótt Reykjavík, en féll úr leik gegn KR-ingum í undanúrslitum að viðstöddum fjölda áhorfenda á Torfnsnesvelli.

Samstarfi Guðjóns Þórðarsonar og BÍ/Bolungarvíkur lauk eftir þetta eina sumar. Liðið var í neðri hlutanum árið eftir en 2013 náðu Djúpmenn sínum besta árangri þegar liðið hafnaði í 5. sæti með 40 stig, aðeins tveimur stigum minna en Víkingur Reykjavíksem náði 2. sætinu. Ekki tókst að fylgja þessum árangri eftir. Tveimur árum síðar endaði BÍ/Bolungarvík á botninum. Um það leyti var ráðist í sameiningu íþróttafélaga við Ísafjarðardjúp undir merkjum Vestra. Hafa knattspyrnumenn keppt undir Vestranafninu upp frá því. Fyrst í þriðju efstu deild, en 2020 í næstefstu deild.

Þjálfarar[breyta | breyta frumkóða]

Tímabil[2] Nafn Athugasemdir
1986 Björn Helgason
1987 Jakob Ólason
1988 Jóhann Króknes Torfason
1989 Örnólfur Oddsson Spilandi þjálfari
1990 Jóhann Króknes Torfason
1991–1992 Ámundi Sigmundsson Spilandi þjálfari
1993 Helgi Helgason
1994 Einar Friðþjófsson
1995 Björn Ingimarsson Rekinn um mitt tímabil
1995 Örnólfur Oddsson Spilandi þjálfari
1996 Ómar Torfason Spilandi þjálfari
2002–2004 Haukur Benediktsson Spilandi þjálfari
2005 Örnólfur Oddsson
2006–2007 Jónas Leifur Sigursteinsson
2008 Snið:Country data SER Slobodan Milisic
2009 Snið:Country data SER Dragan Kazic
2010 Alfreð Elías Jóhannsson Spilandi þjálfari
2011 Guðjón Þórðarson
2012–2014 Jörundur Áki Sveinsson
2015 Jón Hálfdán Pétursson
2016 Ásgeir Guðmundsson
2017 Snið:Country data ENG Daniel Osafo-Badu Spilandi þjálfari
2017– Bjarni Jóhannsson

Titlar[breyta | breyta frumkóða]

Meistaraflokkur kvenna[breyta | breyta frumkóða]

Saga[breyta | breyta frumkóða]

Eftir að meistaraflokkur kvenna hjá ÍBÍ lagaðist af árið 1988 að þá var stofnaður meistaraflokkur kvenna hjá BÍ. Þær sigurðu næst efstu deild árið 1989 en þáðu ekki sæti sitt í efstu deild árið 1990 og tefldu ekki fram liði aftur fyrr en árið 1992.[2] Félagið telfdi síðast fram meistaraflokki kvenna tímabilið 2015 í sameiningu við Bolvíkinga og Íþróttafélag Reykjavíkur undir nafninu ÍR/BÍ/Bolungarvík.

Þjálfarar[breyta | breyta frumkóða]

Tímabil[2] Nafn Heiti Athugasemdir
1989 Rúnar Guðmundsson Boltafélag Ísafjarðar
1992 Björn Helgason Boltafélag Ísafjarðar
1993 Örnólfur Oddsson Boltafélag Ísafjarðar
2000 Dögg Lára Sigurgeirsdóttir Boltafélag Ísafjarðar Spilandi þjálfari
2006 Tómas Emil Guðmundsson BÍ/Bolungarvík
2007 Sigþór Snorrason BÍ/Bolungarvík
2012–2014 Jónas Leifur Sigursteinsson BÍ/Bolungarvík
2015 Halldór Þorvaldur Halldórsson ÍR/BÍ/Bolungarvík

Titlar[breyta | breyta frumkóða]

Heimildir[breyta | breyta frumkóða]

  1. „Vestri - Knattspyrnusamband Íslands“. www.ksi.is. Sótt 25. ágúst 2017.
  2. 2,0 2,1 2,2 2,3 Sigurður Pétursson (2017). Knattspyrnusaga Ísfirðinga. Púkamót, félag. ISBN 978-9935-24-189-4.
  3. „Vestri ræður ríkjum á Vestfjörðum“. mbl.is. Sótt 25. ágúst 2017.
  4. „/ Fréttir / Íþróttafélagið Vestri“. Hsv.is. Sótt 28. nóvember 2016.
  5. „Vestri kemur í stað BÍ/Bolungarvíkur - Knattspyrnusamband Íslands“. www.ksi.is. Sótt 25. ágúst 2017.

Ytri tenglar[breyta | breyta frumkóða]