Joachim von Ribbentrop
| Joachim von Ribbentrop | |
|---|---|
 Ribbentrop árið 1938. | |
| Utanríkisráðherra Þýskalands | |
| Í embætti 4. febrúar 1938 – 30. apríl 1945 | |
| Kanslari | Adolf Hitler |
| Forveri | Konstantin von Neurath |
| Eftirmaður | Arthur Seyss-Inquart |
| Persónulegar upplýsingar | |
| Fæddur | 30. apríl 1893 Wesel, þýska keisaradæminu |
| Látinn | 16. október 1946 (53 ára) Nürnberg, Bæjaralandi, Þýskalandi |
| Dánarorsök | Hengdur |
| Stjórnmálaflokkur | Nasistaflokkurinn |
| Maki | Anna Elisabeth Henkell (g. 1920) |
| Börn | 5 |
| Starf | Athafnamaður, stjórnmálamaður, erindreki |
| Undirskrift |  |
Ulrich Friedrich Wilhelm Joachim von Ribbentrop (30. apríl 1893 – 16. október 1946), venjulega kallaður Joachim von Ribbentrop, var utanríkisráðherra Þýskalands nasismans frá 1938 til 1945.
Æviágrip
[breyta | breyta frumkóða]Ribbentrop fæddist árið 1893 í bænum Wesel og var sonur ofursta í þýska hernum og kaupmannsdóttur.[1] Hann flutti til Kanada þegar hann var átján ára gamall en sneri aftur til Þýskalands þegar fyrri heimsstyrjöldin hófst árið 1914 til þess að skrá sig í herinn. Eftir styrjöldina vann Ribbentrop fyrir sér sem kampavínssali.[2]
Ribbentrop kynntist Adolf Hitler í samkvæmi hjá bankastjóranum Kurt Baron von Schröder árið 1920 eða 1921.[3] Hann vakti fyrst athygli Hitlers sem víðförull athafnamaður sem vissi meira um utanríkismál en flestir háttsettir nasistar. Hann kom því til leiðar í janúar 1933 að Hitler fundaði með Franz von Papen, sem leiddi til þess að Hitler var skipaður kanslari Þýskalands stuttu síðar.[4] Hann varð trúnaðarvinur Hitlers, en vinátta þeirra fór mjög í taugarnar á öðrum flokksmönnum sem töldu Ribbentrop grunnhygginn og hæfileikalausan. Hann var útnefndur sendiherra til Bretlands árið 1936 og utanríkisráðherra Þýskalands í febrúar 1938.
Fyrir seinni heimsstyrjöldina lék Ribbentrop lykilhlutverk í stofnun Stálbandalags Þjóðverja við Ítalíu og í gerð hlutleysissáttmála við Sovétríkin sem þekkt varð sem Molotov-Ribbentrop-sáttmálinn í höfuðið á Ribbentrop og sovéska utanríkisráðherranum Vjatsjeslav Molotov. Eftir árið 1941 döluðu áhrif Ribbentrop nokkuð.
Ribbentrop var handtekinn í júní 1945 og réttað yfir honum við Nürnberg-réttarhöldin þar sem hann var dæmdur fyrir þátt sinn í að hefja seinni heimsstyrjöldina í Evrópu og fyrir að stuðla að framkvæmd Helfararinnar. Þann 16. október 1946 varð Ribbentrop fyrstur sakfelldra nasista tekinn af lífi og hengdur.[5]
Heimild
[breyta | breyta frumkóða]- Fyrirmynd greinarinnar var „Joachim von Ribbentrop“ á ensku útgáfu Wikipedia. Sótt 7. október 2017.
Tilvísanir
[breyta | breyta frumkóða]- ↑ Roald Nerdrum (27. janúar 1940). „Maðurinn sem samdi um Hitler við Rússa“. Morgunblaðið. bls. 5.
- ↑ „Hægri hönd Hitlers“. Vísir. 11. mars 1937. bls. 3.
- ↑ „Joachim von Ribbentrop: Utanríkisráðherra Stór-Þýskalands“. Þjóðin: tímarit sjálfstæðismanna. 1. júní 1939. bls. 125–127.
- ↑ „Metorðagjarni vínsalinn, sem varð utanríkisráðherra Hitlers“. Alþýðublaðið. 14. september 1939. bls. 3.
- ↑ „Aftökur þýzku nazistaforingjanna“. Tíminn. 24. október 1946. bls. 1; 4.