Hvalvatnsfjörður
Hvalvatnsfjörður er stuttur og grunnur fjörður yst á skaganum milli Eyjafjarðar og Skjálfandaflóa. Hann dregur nafn af Hvalvatni, lóni sem Fjarðará fellur í og er aðskilið frá firðinum sjálfum af malarkambi. Austan við fjörðinn gnæfa Hnausafjall og Bjarnarfjall, en vestan við hann eru fjöllin Darri, Lútur, og Þorgeirshöfði, sem skilur hann frá Þorgeirsfirði.
Hvalvatnsfjörður og næsti fjörður til vesturs, Þorgeirsfjörður, heita einu nafni Fjörður (kvk.ft.). Þar voru nokkrir bæir áður fyrr, en eru nú allir í eyði:
- Arnareyri, fór í eyði 1934;
- Brekka, fór í eyði 1924;
- Gil, fór í eyði 1899;
- Kaðalstaðir, fóru í eyði 1933;
- Kussungsstaðir, fóru í eyði 1904;
- Tindriðastaðir, fóru í eyði 1944;
- Þverá, fór í eyði 1913.
Frá Hvalvatnsfirði er hægt að komast landveg eftir fjórum mismunandi leiðum: Suður Leirdalsheiði til Höfðahverfis (jeppavegur, F839), vestur yfir hálsinn milli Lúts og Þorgeirshöfða til Þorgeirsfjarðar og austur yfir Sandskarð eða norðaustur yfir skriður Bjarnarfjalls til Flateyjardals. Rétt er að vara við því að síðasta leiðin er mjög varasöm fyrir ókunnuga.
Tengill
[breyta | breyta frumkóða]- Mynd af Hvalvatnsfirði Geymt 15 október 2007 í Wayback Machine
Þessi Íslandsgrein sem tengist landafræði er stubbur. Þú getur hjálpað til með því að bæta við greinina.