Hróarskelda
Hróarskelda (danska: Roskilde) er bær á dönsku eyjunni Sjálandi, 30 km vestan við Kaupmannahöfn. Þar bjuggu rúmlega 50.000 árið 2023. Hróarskelda var sameinuð nágrannasveitarfélögunum Gundsø og Ramsø árið 2007 en hið sameinaða sveitarfélag var áfram kennt við Hróarskeldu.
Bærinn er gamall og var höfuðstaður Danmerkur frá upphafi konungdæmisins til u.þ.b. 1400, þegar Kaupmannahöfn tók við því hlutverki. Dómkirkjan í Hróarskeldu er frá 12. og 13. öld og var fyrsta dómkirkjan í gotneskum stíl sem var hlaðin úr múrsteinum. Hún var eina dómkirkjan á Sjálandi fram á 20. öld. Kirkjan er greftrunarstaður danskra kónga og drottninga og vinsæll áningarstaður ferðamanna, en 125.000 manns heimsækja hana árlega. Kirkjan er á heimsminjaskrá UNESCO síðan 1995.
Í Hróarskeldu er miðstöð rannsókna og endurgerða á víkingaskipum í Víkingaskipasafninu. Þar er hægt að skoða fimm skip ólíkrar gerðar sem sökkt var í Hróarskeldufjörð árið 1070 og voru grafin upp 1962. Á safnasvæðinu er höfn og nokkur verkstæði sem sérhæfa sig í smíði víkingaskipa.
Nálægt bænum hefur verið haldin tónlistarhátið árlega á sumrin frá 1971. Hróarskelduhátíðin er sú stærsta sem haldin er á Norðurlöndum og með þeim stærri í Evrópu.
Tengt efni
[breyta | breyta frumkóða]Tenglar
[breyta | breyta frumkóða]
Þessi landafræðigrein sem tengist Danmörku er stubbur. Þú getur hjálpað til með því að bæta við greinina.