Gretchen Whitmer
Gretchen Esther Whitmer (fædd 23. ágúst 1971) er bandarískur lögfræðingur og stjórnmálamaður úr röðum demókrata sem hefur verið fylkisstjóri í Michigan-fylki frá árinu 2019. Áður hafði hún setið í báðum deildum löggjafarþings fylkisins, neðri deild þess frá 2001 til 2006 og efri deildinni frá 2006 til 2015.
Whitmer er fædd í Lansing í Michigan og uppalin þar og síðar í Grand Rapids. Hún fór í háskóla í Michigan State University og lauk lagaprófi frá Detroit College of Law. Stjórnmálaferill hennar hófst með kjöri hennar til neðri deildar fylkisþingsins árið 2000 en árið 2006 sigraði hún sérstakar kosningar um laust sæti í efri deildinni. Frá 2011 til 2015 leiddi hún demókrataflokkinn í efri deildinni. Whitmer vakti athygli á landsvísu 2013 vegna umræðu um þungunarrof þar sem hún lýsti reynslu sinni af því að hafa verið þolandi kynferðisofbeldis. Whitmer náði kjöri sem fykilsstjóri Michigan 2018 og tók við því embætti 2019 og gegnir því enn.
Whitmer hefur vakið athygli á landsvísu í Bandaríkjunum. Árið 2020 var hún valin af demókrötum til að flytja andsvar þeirra við stefnuræðu Donald Trump, þáverandi forseta Bandaríkjanna. Whitmer hefur verið nefnd af fjölmiðlum og álitsgjöfum sem mögulegur frambjóðandi til embættis forseta.
