Giorgio Napolitano

Úr Wikipediu, frjálsa alfræðiritinu
Jump to navigation Jump to search
Giorgio Napolitano
Presidente Napolitano.jpg
Forseti Ítalíu
Í embætti
15. maí 2006 – 14. janúar 2015
Persónulegar upplýsingar
Fæddur29. júní 1925 (1925-06-29) (93 ára)
Napólí, Ítalíu
ÞjóðerniÍtalskur
StjórnmálaflokkurÍtalski kommúnistaflokkurinn (1945–1991)
Ítalski vinstri-lýðræðisflokkurinn (1991–1998)
Vinstri-demókratar (1998–2006)
Óflokksbundinn (2006-)
MakiClio Maria Bittoni (g. 1959)
Börn2
HáskóliUniversità degli Studi di Napoli Federico II
StarfStjórnmálamaður
Undirskrift

Giorgio Napolitano (f. 29. júní 1925)[1] er ítalskur stjórnmálamaður sem var 11. forseti Ítalíu frá 2006 til 2015. Hann er eini maðurinn sem hefur verið endurkjörinn í embættið. Vegna áhrifastöðu hans í ítölskum stjórnmálum á forsetatíð hans kalla gagnrýnendur hans hann oft Re Giorgio eða „Georg konung“.[2] Hann var forseti Ítalíu lengur en nokkur annar frá stofnun lýðveldisins.

Þótt ítalska forsetaembættið sé ópólitískt embætti sem á að standa vörð um stjórnarskrá Ítalíu var Napolitano lengi meðlimur í ítalska kommúnistaflokknum (og ókommúniskum jafnaðarflokkum sem tóku við eftir upplausn kommúnistaflokksins). Hann var lengi meðlimur í hægrisinnaðri hlut flokksins sem hvatti til nútímavæðingar. Napolitano var fyrst kjörinn á ítalska fulltrúaþingið árið 1953 og var forseti þess frá 1992 til 1994. Hann var innanríkisráðherra Ítalíu frá 1996 til 1998 í stjórnartíð Romano Prodi.

Árið 2005 var Napolitano útnefndur öldungadeildarþingmaður til lífstíðar af forsetanum Carlo Azeglio Ciampi. Næsta ár var hann kjörinn forseti Ítalíu af ítalska þinginu. Á fyrra kjörtímabili sínu staðfesti Napolitano bæði miðvinstristjórn Prodi og miðhægristjórn Silvio Berlusconi. Í nóvember árið 2011 sagði Berlusconi af sér sem forsætisráðherra vegna fjármálavandræða. Napolitano bað í kjölfarið Mario Monti að mynda nýja ríkisstjórn sem gagnrýnendur kölluðu „forsetastjórnina“.[3]

Þegar sjö ára kjörtímabili hans lauk í apríl árið 2013 féllst Napolitano (sem þá var 87 ára) með semingi á að bjóða sig fram á ný til þess að standa vörð um ríkisstofnanir Ítalíu eftir pattstöðu sem kom upp á ítalska þinginu í kjölfar þingkosninga ársins 2013. Sem forseti leysti Napolitano úr stjórnarkreppunni með því að bjóða Enrico Letta að stofna til þjóðstjórnar. Eftir átta og hálft ár í embætti sagði Napolitano af sér, þá 89 ára gamall, í janúar árið 2015.[4]

Gagnrýnendur Napolitanos sökuðu hann oft um að hafa breytt táknrænu forsetaembætti Ítalíu í pólitískt embætti vegna þess hve oft hann valdi í reynd ríkisstjórnir og embættismenn þegar mjótt var á munum eftir kosningar.[5][6] Eins og stendur er Napolitano eini lifandi fyrrum forseti Ítalíu.

Tilvísanir[breyta | breyta frumkóða]

  1. Profile of Giorgio Napolitano
  2. Donadio, Rachel 2. desember 2011, „From Ceremonial Figure to Italy’s Quiet Power Broker". The New York Times. Skoðað 6. ágúst 2018.
  3. Il governo del presidente
  4. „Italian President Napolitano announces retirement“. BBC. 14. janúar 2015. Sótt 6. ágúst 2018.
  5. Grillo: «Napolitano monarca medievale». Montecitorio: ecco le «controconsultazioni»
  6. Napolitano, il monarca indispensabile


Fyrirrennari:
Carlo Azeglio Ciampi
Forseti Ítalíu
(15. maí 200614. janúar 2015)
Eftirmaður:
Sergio Mattarella