Arnaldur Indriðason

Arnaldur Indriðason (fæddur 28. janúar 1961 í Reykjavík) er íslenskur spennusagnahöfundur og sagnfræðingur.

Arnaldur er sonur Þórunnar Ólafar Friðriksdóttur og Indriða G. Þorsteinssonar rithöfundar. Hann lauk BA-prófi í sagnfræði frá Háskóla Íslands árið 1996 og starfaði við Morgunblaðið frá því hann útskrifaðist úr Menntaskólanum við Hamrahlíð árið 1981, ýmist í lausamennsku eða fullu starfi. Hann var kvikmyndagagnrýnandi blaðsins frá 1986 til 2001.

Arnaldur hefur sent frá sér tuttugu og átta skáldsögur sem allar eru spennusögur. Skáldsögur hans hafa verið þýddar yfir á um 40 tungumál og hlotið góðar viðtökur, sérstaklega í Þýskalandi og Frakklandi en alls hafa selst yfir fjórtán milljónir eintaka af skáldsögum hans og þær hafa komist ofarlega á metsölulista í mörgum Evrópulöndum. Arnaldur hefur einnig unnið útvarpsleikrit upp úr nokkrum bóka sinna sem Leiklistardeild ríkisútvarpsins hefur flutt. Kvikmynd gerð eftir einni skáldsögu hans, Mýrinni, í leikstjórn Baltasars Kormáks, var frumsýnd árið 2006.

Arnaldur hlaut Glerlykilinn, Norrænu glæpasagnaverðlaunin, fyrir Mýrina árið 2002 og aftur ári síðar fyrir Grafarþögn.

Árið 2005 hlaut hann hin virtu ensku glæpasagnaverðlaun Gullrýtinginn frá Samtökum glæpasagnahöfunda fyrir ensku útgáfuna af Grafarþögn. Hann hefur einnig hlotið Grand Prix Littèrature Policiére í Frakklandi, sænsku Martin Beck verðlaunin fyrir Röddina og bandarísku Barry-verðlaunin fyrir Kleifarvatn, svo og fjölmargar aðrar viðurkenningar.

Skáldsögur

1997 – Synir duftsins
1998 – Dauðarósir
1999 – Napóleonsskjölin
2000 – Leyndardómar Reykjavíkur 2000 (kafli í spennusögu eftir nokkra höfunda)
2000 – Mýrin
2001 – Grafarþögn
2002 – Röddin
2003 – Bettý
2004 – Kleifarvatn
2005 – Vetrarborgin
2006 – Konungsbók
2007 – Harðskafi
2008 – Myrká
2009 – Svörtuloft
2010 – Furðustrandir
2011 – Einvígið
2012 – Reykjavíkurnætur
2013 – Skuggasund
2014 – Kamp Knox
2015 – Þýska húsið
2016 – Petsamo
2017 - Myrkrið veit
2018 - Stúlkan hjá brúnni
2019 - Tregasteinn
2020 - Þagnarmúr
2021 - Sigurverkið
2022 - Kyrrþey
2023 - Sæluríkið
2024 - Ferðalok