Valtýr Stefánsson
Valtýr Stefánsson (26. janúar 1893, að Möðruvöllum á Hörgárdal — 16. mars 1963) var ritstjóri Morgunblaðsins í 39 ár og talinn faðir íslenskrar nútíma blaðamennsku.[1]
Ævi og störf[breyta | breyta frumkóða]
Foreldrar Valtýs voru Stefán Stefánsson, skólameistari, og kona hans, Steinunn Frimannsdóttir frá Helgavatni í Húnavatnssýslu. Hann stundaði nám i gagnfræðaskólanum á Akureyri, en lauk síðan stúdentsprófi við Menntaskólann í Reykjavík árið 1911. Síðan stundaði hann búnaðarnám í Hólaskóla árin 1911—1912 til þess að búa sig undir framhaldsnám í búnaðarfræðum. Hóf hann siðan nám við Landbúnaðarháskólann í Kaupmannahöfn og lauk heimspekiprófi í Kaupmannahöfn árið 1913 en kandidatsprófi í búnaðarfræðum árið 1914. Síðan stundaði hann framhaldsnám við Landbúnaðarháskólann árin 1915—1917 og vann þá jafnframt við jarðarbótadeild danska Heiðafélagsins frá árslokum 1917 til ársloka 1918. [2]
Heimkominn frá námi hóf hann störf sem búnaðarráðunautur en var jafnframt ritstjóri og meðútgefandi búnaðarblaðsins Freys 1923-1925, Árið 1924 var hann ráðinn ritstjóri Morgunblaðsins ásamt Jóni Kjartanssyni og var hann ritstjóri þess til æviloka 1963. Jafnframt því var hann um langa hríð ritstjóri Ísafoldar þegar hún var vikublaðsútgáfa Morgunblaðsins og Lesbókar þess sömuleiðis.Valtýr byggði Morgunblaðið upp, breytti því úr bæjarblaði í Reykjavík í „blað allra landsmanna“ líkt og sagði í auglýsingaslagorði þess, gerði það að stórveldi íslenskrar fjölmiðlunar og var vakandi fyrir helstu straumum í blaðaútgáfu. Þá kappkostaði hann öguð og skipuleg vinnubrögð í blaðamennsku, en á nær fjögurra áratuga ferli fóstraði hann ófáar kynslóðir íslenskra blaðamanna.
Auk blaðamennsku gegndi Valtýr ýmsum trúnaðarstörfum öðrum. Hann var bæjarfulltrúi í Reykjavík fyrir Sjálfstæðisflokkinn 1938-1946, sat í útvarpsráði, var formaður menntamálaráðs, í stjórn Búnaðarfélags Íslands og í stjórn Skógræktarfélags Íslands frá 1940 til 1961, en skógrækt var honum hjartfólgin. Valtýr var tvisvar formaður Blaðamannafélags Íslands og var gerður að heiðursfélaga þess.
Valtýr Stefánsson kvæntist 17. maí 1917 Kristínu Jónsdóttur (1888- 1959), listmálara frá Arnarnesi við Eyjafjörð. Áttu þau tvær dætur Helgu leikkonu og Huldu blaðamann og þýðanda.
Tilvísun[breyta | breyta frumkóða]
- ↑ „Valtýr Stefánsson - Ritstjóri Morgunblaðsins“. forlagid.is. Afrit af upprunalegu geymt þann 19. mars 2015. Sótt 1. ágúst 2012.
- ↑ „Morgunblaðið 19. mars 1963 Valtýr Stefánsson ristj. látinn“. timarit.is. Sótt 1. ágúst.
{{cite web}}: Stikinn|accessyear=er ekki þekktur (legg til|access-date=) (hjálp)
