Sölvi Björn Sigurðsson

Sölvi Björn Sigurðsson (f. 7. október 1978) er íslenskur rithöfundur og ljóðskáld.

Sölvi er fæddur á Selfossi. Hann lauk stúdentsprófi frá Menntaskólanum í Reyjavík, lærði frönsku í Montpellier og París og lauk BA-prófi í íslensku og bókmenntafræði frá Háskóla Íslands árið 2002 og mastersprófi í útgáfufræðum frá Stirling-háskóla í Skotlandi 2005.

Sölvi hefur líka fengist við þýðingar á verkum skálda eins og John Keats (í tímaritinu Andblæ 1999) W. H. Auden, Arthur Rimbaud og W. B. Yeats. Ljóð eftir hann komu út í safnritinu Líf í ljóðum: 22 íslensk samtímaskáld 2001 og 2002 kom út Vökunætur glatunshundsins sem innihélt að hálfu leyti frumort ljóð og að hálfu leyti ljóðaþýðingar. 2003 kom út fyrsta skáldsaga hans hjá Máli og menningu, Radíó Selfoss, sem er uppvaxtarsaga frá Selfossi. 2005 kom út Gleðileikurinn djöfullegi, söguljóð með tilvísun í Hinn guðdómlega gleðileik Dantes, ort undir þríliðahætti þar sem drukkið ungskáld reikar frá Hlemmi að Lækjartorgi af einum bar á annan í leit að sinni heittelskuðu Klöru í fylgd Dantes sjálfs. Árið 2006 kom síðan út önnur skáldsaga hans, Fljótandi heimur, Síðustu dagar móður minnar 2009 og sögulega skáldsagan Gestakomur í Sauðlauksdal 2011.

Hann hlaut íslensku bókmenntaverðlaunin árið 2019 fyrir bókina Selta - Apókrýfa úr ævi landlæknis.

Helstu verk

• 2019: Selta - Apókrýfa úr ævi landlæknis
• 2016: Blómið (skáldsaga)
• 2015: 50 1/2 sonnetta (ljóð)
• 2015: Kristalsaugað (ljóð)
• 2014: Melitta Urbancic, Frá hjara veraldar (ljóðaþýðingar)
• 2014: Robert Burns, Tam 'O Shanter (ljóðaþýðingar)
• 2013: Stangveiðar á Íslandi (fræðirit)
• 2013: Íslensk vatnabók (fræðirit)
• 2012: Sláturtíðin (ljóð)
• 2011: Gestakomur í Sauðlauksdal (skáldsaga)
• 2010: William Shakespeare, Ofviðrið (leiktextaþýðing)
• 2009: Síðustu dagar móður minnar (skáldsaga)
• 2008: Arthur Rimbaud, Árstíð í helvíti (ljóðaþýðingar)
• 2006: Fljótandi heimur (skáldsaga)
• 2005: Gleðileikurinn djöfullegi (söguljóð)
• 2003: Radíó Selfoss (skáldsaga)
• 2002: Vökunætur glatunshundsins (ljóð og ljóðaþýðingar)
• 2000: Ást og frelsi (ljóð)

Tenglar

• Um Sölva Björn á Bókmenntavefnum^{[óvirkur tengill]}