Hlemmur

Úr Wikipediu, frjálsa alfræðiritinu
Jump to navigation Jump to search
Hlemmur meðan hann var enn skiptistöð Strætó 2013.

Hlemmur er yfirbyggt torg sem stendur efst á Hverfisgötu, gegnt aðallögreglustöð borgarinnar. Þar er nú mathöllin Hlemmur - Mathöll. Nafnið Hlemmur vísar til brúarstubbs sem þar var yfir lækinn Rauðará, sem Rauðarárstígur í Reykjavík er kenndur við.

Komið var upp vatnsþró á Hlemmtorgi,[1] til að brynna hestum, skömmu eftir stofnun Vatnsveitu Reykjavíkur. Árið 2005 var höggmyndin „Klyfjahesturinn“ eftir Sigurjón Ólafsson, sem var gerð fyrir mörgum árum og stóð áður við Sogamýri, flutt til og sett niður rétt við Hlemm til minnis um þetta.

Á fyrri hluta tuttugustu aldar stóð Gasstöð Reykjavíkur við Hlemm. Hana hefur Megas sungið um. Einnig kemur Gasstöðin við sögu í skáldsögu Arnaldar Indriðasonar, Grafarþögn. Þar sem torgið er nú stóðu meðal annars bensínstöð og leigubílastöð Hreyfils áður en núverandi bygging var reist.

Árið 1978 var byggingin á Hlemmi reist sem ein af aðalskiptistöðvum Strætó bs. í Reykjavík eftir teikningu Gunnars Hanssonar arkitekts. Skiptistöðin var um árabil eins konar afdrep útigangsfólks í Reykjavík. Kvikmyndin Hlemmur frá 2003 fjallar um það. Frá 1980-1984 var Hlemmur auk þess ein aðalfélagsmiðstöð ungra upprennandi pönkara sem komu saman á hverjum degi og héngu þar saman. Á þeim tíma var töluvert um afþreyingarstarfsemi í kringum Hlemm, svo sem skyndibitastaðir, spilasalir og vídeóleigur.

Árið 2017 var ákveðið að BSÍ tæki við af Hlemmi sem samgöngumiðstöð fyrir Höfuðborgarsvæðið. Sama ár var Hlemmur - Mathöll opnuð þar eftir miklar endurbætur á húsnæðinu. Árið 2019 var kynnt nýtt deiliskipulag fyrir Hlemm og nærliggjandi svæði þar sem gert er ráð fyrir að stækka torgið austan við Hlemm og leiða umferð frá Suðurlandsbraut þar norðan við.

Tengt efni[breyta | breyta frumkóða]

Tilvísanir og heimildir[breyta | breyta frumkóða]

  • ^  Morgunblaðið, 23. október 1958, bls. 20.
  Þessi landafræðigrein er stubbur. Þú getur hjálpað til með því að bæta við greinina.