Rosmhvalanes

Úr Wikipediu, frjálsa alfræðiritinu
(Endurbeint frá Miðnes)
Jump to navigation Jump to search

Rosmhvalanes er er nafn á nesi sem gengur norður úr Reykjanesi vestanverðu, milli Ytri-Njarðvíkur og Kirkjuvogs. Nesið er einnig oft kallað Miðnes. Garðsskagi er nyrsti oddi Rosmhvalaness. Í forníslensku voru rostungar nefndir rosmhvalir en við þá er nesið kennt. Þeir sem eru ættaðir frá Rosmhvalanesi eða búa þar eru nefndir Rosmhvelingar. Keflavík, Garður og Sandgerði eru á nesinu, einnig Keflavíkurflugvöllur.

Ingólfur Arnarson gaf/seldi Steinunni gömlu Rosmhvalanes. Eða eins og segir í Landnámu: Steinun hin gamla, frændkona Ingólfs, fór til Islands og var með Ingólfi hinn fyrsta vetur. Hann bauð að gefa henni Rosmhvalanes allt fyrir utan Hvassahraun, en hún gaf fyrir heklu flekkótta ok vildi kaup kalla; henni þótti það óhættara við riftingum.

Í Egils sögu segir einnig lítillega frá Rosmhvalanesi:

Ketill gufa kom til Íslands, þá er land var mjög byggt; hann var hinn fyrsta vetur að Gufuskálum á Rosmhvalanesi. Ketill hafði komið vestan um haf af Írlandi; hann hafði með sér þræla marga írska. Lönd voru öll byggð á Rosmhvalanesi þann tíma; réðst Ketill því þaðan í brott og inn á Nes og sat annan vetur á Gufunesi og fékk þar engan ráðstafa. Síðan fór hann inn í Borgarfjörð og sat þar hinn þriðja vetur, er síðan er kallað að Gufuskálum, en áin Gufuá, er þar fellur í ofan, er hann hafði skip sitt í um veturinn.
  Þessi landafræðigrein sem tengist Íslandi er stubbur. Þú getur hjálpað til með því að bæta við greinina.