Jörundur Þorsteinsson

Jörundur Þorsteinsson var biskup á Hólum frá 1267 til dauðadags, 1313.

Foreldrar Jörundar voru Þorsteinn Einarsson og Guðlaug Grímsdóttir. Hann lærði hjá Brandi Jónssyni ábóta í Þykkvabæjarklaustri, síðar biskupi. Taldi Brandur Jörund vera minnugastan þeirra sem hann hafði kennt.

Jörundur var vígður biskup 1267 og var Hólabiskup í 46 ár. Hann var hagsýnn og hygginn stjórnandi, auðgaði mjög Hólastól og endurbyggði dómkirkjuna á staðnum (skömmu eftir 1280). Hann setti nunnuklaustur á Reynistað 1295 og munkaklaustur á Möðruvöllum í Hörgárdal 1296. Hann var fylgjandi hinum fornu kirkjustjórnarháttum og fylgdi ekki Árna Þorlákssyni Skálholtsbiskupi í staðamálum síðari, þ.e. í kröfum um að kirkjan fengi yfirráð yfir kirkjustöðum.

Jörundur andaðist 1. febrúar 1313, þá orðinn ellimóður mjög.

Heimildir

Páll Eggert Ólason: Íslenskar æviskrár III.

Fyrirrennari:
Brandur Jónsson

Hólabiskup
(1267 – 1313)

Eftirmaður:
Auðunn rauði