Guðmunda Andrésdóttir

Guðmunda Andrésdóttir (3. nóvember 1922 - 31. ágúst 2002) var íslensk myndlistarkona. Hún er einn helsti fulltrúi íslenskrar abstraktlistar.

Ævi

Guðmunda fæddist í Reykjavík og foreldrar hennar voru Salvör Ingimundardóttir (1888-1980) hjúkrunarkona og Andrés P. Böðvarsson (1896-1931) sjómaður.

Guðmunda lauk verslunarprófi frá Verzlunarskóla Íslands árið 1941. Hún hóf myndlistarnám árið 1945 er hún hélt til náms í Svíþjóð. Hún lauk kennaraprófi frá Konstfackskolan í Stokkhólmi árið 1946 og stundaði nám við málaraskóla Otte Skjöld í Stokkhólmi 1945-1946 og Listaháskólann í Stokkhólmi 1946-1948. Hún hélt síðar til Parísar og nam við L'Académie de la Grande Chaumière árið 1951 og við L'Académie Ranson frá 1951-1953. Árið 1953 flutti hún aftur til Íslands.

Hún hélt nokkrar einkasýningar, þá fyrstu árið 1956 og tók þátt í samsýningum hérlendis og erlendis. Hún var um árabil einn félaga í Septem-hópnum sem var vettvangur íslenskra abstraktmálara um árabil. Árið 1990 var haldin yfirlitssýning á verkum Guðmundu á Kjarvalsstöðum.

Meðal safna sem eiga verk eftir Guðmundu eru Listasafn Íslands, Listasafn Reykjavíkur, Listasafn ASÍ, Listasafn Kópavogs og Colby Art Museum í Maine í Bandaríkjunum en einnig eiga einkasafnarar víðsvegar um heim verk eftir hana. Listasafn Háskóla Íslands á einnig fjölda verka eftir Guðmundu, m.a. 76 verk sem hún gaf safninu.

Guðmunda fékk franskan myndlistarstyrk árið 1952 og árið 1971 hlaut hún tólf mánaða starfslaun ríkisins. Hún var valin borgarlistamaður Reykjavíkurborgar árið 1995.

Samhliða myndlistinni starfaði Guðmunda á skrifstofu Laugavegsapóteks frá 1941-1945, var teiknikennari við Lindargötuskóla 1953-1956 og Gagnfræðaskóla Vesturbæjar 1953-1956 en frá 1956-1990 var hún skrifstofumaður hjá Rafmagnsveitu ríkisins og Orkustofnun.

Hjá Listasafni Íslands er Styrktarsjóður Guðmundu Andrésdóttur starfræktur. Til sjóðsins var stofnað með arfi frá Guðmundu og er sjóðnum ætlað að styrkja myndlistarfólk til framhaldsnáms.