Þorsteinn Sæmundsson (stjörnufræðingur)

Þorsteinn Sæmundsson, stjörnufræðingur (15. mars 1935 - 26. nóvember 2023). Starfaði sem sérfræðingur við Eðlisfræðistofnun Háskólans frá 1963 og síðan við Raunvísindastofnun Háskóla Íslands frá stofnun hennar 1966. Gegndi stöðu fræðimanns þar frá 1990 og stöðu vísindamanns frá 1999 til starfsloka 2005. Stúdent frá Menntaskólanum í Reykjavík 1954, B.Sc Honours í stjörnufræði frá háskólanum í St. Andrews á Skotlandi 1958 með stærðfræði, eðlisfræði og jarðfræði sem aukagreinar. Doktorspróf (Ph.D.) í stjörnufræði frá Lundúnaháskóla 1962. Félagi í breska stjörnuskoðunarfélaginu frá 1952 og félagi í konunglega breska stjörnufræðifélaginu frá 1962.

Deildarstjóri háloftadeildar Raunvísindastofnunar Háskólans frá 1967 til 2005. Vann við útreikninga og útgáfu Almanaks Háskóla Íslands (1963- ) og útreikninga fyrir Sjómannaalmanakið (1997-2006). Sá um uppbyggingu og rekstur segulmælingastöðvar Háskólans frá 1963 til 2005 (fyrstu þrjú árin með Þorbirni Sigurgeirssyni, prófessor, sem kom stöðinni á fót 1957). Aðstoðaði við uppsetningu norðurljósamyndavélar á Rjúpnahæð 1957, sá um uppsetningu annarrar slíkrar myndavélar við Egilsstaði 1965 og annaðist rekstur þeirra um árabil. Í stjórn Hins íslenska Þjóðvinafélags og ritstjóri almanaks þess frá 1967 til 1978. Í orðanefnd Skýrslutæknifélags Íslands (Tölvuorðanefnd) frá 1978 og orðanefnd Stjarnvísindafélags Íslands frá 1990.

Í stjórn sælgætisverksmiðjunnar Freyju frá 1965 til 1976. Einn af forgöngumönnum undirskriftasöfnunarinnar Varið land 1974.

Heimildir

• Æviferill (Sótt 19. apríl 2007)

Ritaskrá

• Ritaskrá (Sótt 19. apríl 2007)

Tenglar

• Almanaksskýringar (Sótt 22. apríl 2007)
• Orðaskrá úr stjörnufræði
• Tölvuorðasafn