Þingkosningar í Bretlandi 2024

Þingkosningarnar í Bretlandi 2024

4. júlí 2024

650 sæti á breska þinginu 326 sæti þarf fyrir meirihluta

Kjörsókn: 59,9% 7,4%

Flokkur Formaður % Sæti +/– Verkamannaflokkurinn Keir Starmer 33,7 412 +211 Íhaldsflokkurinn Rishi Sunak 23,7 121 -250 Frjálslyndir demókratar Ed Davey 12,2 71 +63 Skoski þjóðarflokkurinn John Swinney 9,9 9 -38 Sinn Féin Mary Lou McDonald 0,7 7 0 Óflokksbundnir 2,0 6 +6 Lýðræðislegi sambandsflokkurinn Gavin Robinson 0,6 5 -3 Umbótaflokkurinn Nigel Farage 14,3 4 +4 Græningjaflokkurinn Carla Denyer & Adrian Ramsay 6,8 4 +3 Plaid Cymru Rhun ap Iorwerth 0,7 4 +2 Önnur framboð 1,2 5 +2 Hér eru skráðir þeir flokkar sem náðu manni á þing. Kort af niðurstöðum kosninganna í hverju kjördæmi

Þingkosningar fóru fram í Bretlandi 4. júlí 2024. Kosið var um 650 þingsæti í breska þinginu. Verkamannaflokkurinn undir stjórn Keir Starmer vann mikinn meirihluta þingsæta og batt þannig enda á 14 ára stjórnartíð Íhaldsflokksins. Umbótaflokkurinn kom nýr inn á þing og Frjálslyndir demókratar bættu einnig við sig. Skoski þjóðarflokkurinn tapaði hins vegar flestum þingsæta sinna til Verkamannaflokksins.

Undangengið kjörtímabil hafði verið afar róstusamt í breskum stjórnmálum þar sem fjórir höfðu gegnt embætti forsætisráðherra og formanns Íhaldsflokksins. Seinastur þeirra var Rishi Sunak sem leiddi flokkinn í kosningunum. Í kjölfar ósigursins baðst hann lausnar frá embætti forsætisráðherra og tilkynnti jafnframt að hann myndi segja af sér formennsku í Íhaldsflokknum. Keir Starmer gerðist því forsætisráðherra þann 5. júlí.

Þrátt fyrir stórsigur sinn í kosningunum jók Verkamannaflokkurinn aðeins lítillega við hlutfallslegt fylgi sitt miðað við kosningarnar 2019, þar sem flokkurinn galt afhroð. Þetta skýrist af kosningakerfi Bretlands, þar sem keppt er í einmenningskjördæmum, og af því hvernig atkvæðin röðuðust niður á kjördæmin.