Gló stuðningsfélag

Gló stuðningsfélag (áður Styrktarfélag lamaðra og fatlaðra) eru almenn félagasamtök sem hafa það að markmiði að stuðla að aukinni orku, starfshæfni og velferð fólks með fötlun, einkum barna. í dag sinnir félagið hlutverki sínu meðal annars með því að starfrækja Gló Æfingastöð að Háaleitisbraut 11-13 og í Hafnarfirði og sumardvalarheimilið Reykjadal í Mosfellsdal. Þeir sem njóta þjálfunar hjá félaginu eru flestir fatlaðir frá fæðingu. Á hverju ári koma um 1200 einstaklingar til þjálfunar hjá æfingastöðinni og um 200 börn koma til dvalar í Reykjadal.

Félagið var stofnað 1952. Fjórum árum seinna hóf það rekstur endurhæfingarstöðvar en árið 1968 var nafni stöðvarinnar breytt í Æfingastöð SLF, en svo Gló Æfingastöð þann 1. nóvember 2025. Árið 1959 hóf félagið rekstur sumarbúða fyrir fötluð börn. Sumarbúðirnar voru fyrst í Reykjaskóla í Hrútafirði en fluttust svo árið 1963 í Reykjadal í Mosfellsdal. Árið 1972 hóf félagið rekstur leikskóla sem nú heitir Múlaborg og hefur reksturinn færst yfir til Reykjavíkurborgar. Framkvæmdastjóri Gló stuðningsfélags er Bergljót Borg. Stjórn félagsins skipa þau Jórunn Edda Óskarsdóttir formaður, Björn Gústav Jónsson, Diljá Ámundadóttir Zoëga, Hrefna Rós Matthíasdóttir, Linda Björk Ólafsdóttir, Halldór Örn Júlíusson og Harpa Júlíusdóttir.