Innibandý

Bandýleikur.

Stöðluð bandýkúla. Á henni eru 26 göt með jöfnu millibili, hvert 10 mm að þvermáli. Kúlan sjálf er 72 mm að þvermáli og 23 g að þyngd. Á kúlunni eru 1.516 dældir, sem minnka loftmótstöðu hennar og núning við völlinn.

Innibandý er innanhúss-, hóp- og boltaíþrótt spiluð með plastkylfum þar sem markmiðið er að koma lítilli plastkúlu (kölluð bandýkúla) í mark andstæðingsins.

Í bandý eru sex menn í liði, þar af einn markmaður, og hafa þeir allir, fyrir utan markmanninn, kylfu til að stjórna og skjóta kúlunni, en markmaðurinn ver markið með höndum og fótum. Leikmenn mega ekki viljandi nota hendur eða höfuð til að stjórna kúlunni, en leyfilegt er að snerta hana einu sinni í einu með fótunum (oftast til að stoppa hana), en ekki má skora mörk með fótunum eða gefa kúluna með þeim.

Völlur

Staðlaður bandývöllur

Algengast er að bandývöllur sé 40 metrar að lengd og 20 metrar að breidd en einnig er leyfilegt að spila á 36 · 18 m velli og 44 · 22 m velli. Völlurinn skal afmarkaður af 50 cm háu spjaldi með rúnnuðum hornum.

Leiktími

Leiktími er 3 · 20 mínútur með 10 mínútna hléum, leiktími er stöðvaður ef dómari stöðvar leikinn og heldur áfram þegar leikurinn byrjar aftur.

Leikmenn

Hvert lið má hafa mest 20 leikmenn þar af 6 á vellinum í einu, skiptingar eru leyfðar hvenær sem er í leiknum og hefur hvert lið ótakmarkaðar skiptingar.

Búningar

Leikmenn skulu vera í samstæðum búningum sem samanstanda af treyju, stuttbuxum og hnésokkum, einnig skulu þeir vera í innanhússíþróttaskóm,

Ísland

Íslandsmeistaramót hafa verið haldin frá árinu 2005, þar sem leiknir voru styttri leikir en venja er. Laugardaginn 26. september 2009 hófst formleg deildarkeppni í fyrsta sinn með leiki í fullri lengd og voru fjögur lið skráð til keppni. Bandýfélag Kópavogs stóð uppi sem sigurvegari fyrsta tímabilið.

Heimild

• „Leikreglur á íslensku“ (PDF). Sótt 7. nóvember 2025.

Tenglar

• Vefur Alþjóðainnibandýsambandsins

  Þessi íþróttagrein er stubbur. Þú getur hjálpað til með því að bæta við greinina.