Herluf Daa

Herluf Trolle Daa (Herlegdáð) (1565 - 28. febrúar 1630) var hirðstjóri á Íslandi 1606 til 1619. Hann var af gamalli jóskri aðalsætt, en fæddist í Björgvin, sonur Jørgens Daa, höfuðsmanns, og Kirsten Beck. Herluf Daa varð aðmíráll undir Kristjáni IV. Tók þátt í Kalmarófriðnum 1611-1613 milli Danmerkur og Svíþjóðar. Lést skuldum vafinn, meðal annars vegna málareksturs hans gegn Oddi biskupi Einarssyni og fleirum. Í kjölfar þeirra mála var hann sviptur höfuðsmannstign árið 1619 og gert að greiða 3000 ríkisdali í bætur fyrir afglöp. Sektin var aldrei greidd, og þegar hann lést gekk ekkja hans frá búinu.

Eftirmæli á Íslandi

Herluf Daa fékk almennt slæm eftirmæli á Íslandi, og er það fyrst og fremst rakið til deilna við Odd Einarsson, en ætt hans var fjölmenn og valdamikil. Einnig kann að vera að ónákvæmni hafi gætt í embættisfærslu hans sem ekki hafi samræmst nýjum kröfum um bætt skil og tengsl við konungsvaldið í Kaupmannahöfn. Um hann er þessi vísa til:

Höfuðsmaðurinn Herluf Dá

heitir réttu nafni.

Kauðinn bið ég kafni sá

og kroppaður verði af hrafni.

Tengt efni

• Hallfreður Örn Eiríksson: Þjóðsagnir og sagnfræði, í: Saga 1970, bls. 290–291.
• Ragnar Arnalds, Maríumessa, Reykjavík, 2004 (skáldsaga).

Fyrirrennari: Enevold Kruse

Hirðstjóri (1606 – 1619)

Eftirmaður: Frederik Friis

  Þetta æviágrip er stubbur. Þú getur hjálpað til með því að bæta við greinina.