Gísli Freyr Valdórsson
Gísli Freyr Valdórsson (f. 10. júní 1980) er íslenskur blaðamaður.
Ævi og störf
[breyta | breyta frumkóða]Gísli Freyr er stjórnmálafræðingur frá Háskóla Íslands. Hann starfaði sem blaðamaður og pistlahöfundur á Viðskiptablaðinu árin 2008-2013.[1] Hann var jafnframt eigandi Viðskiptablaðsins um nokkurra daga skeið árið 2009 eftir að hafa keypt það fyrir eina krónu til að bjarga því frá greiðslustöðvun.[2]
Gísli Freyr hélt um langt skeið úti vinsælli bloggsíðu á vefsvæði Morgunblaðsins sem nefndist „Frelsisvörnin“. Auk þess að vera virkur innan Sjálfstæðisflokksins hefur Gísli unnið við ýmis önnur félagsstörf. Hann hefur meðal annars starfað innan Samhjálpar og Hvítasunnukirkjunnar Fíladelfíu, en hann sat í stjórn Samhjálpar um tíma og auk þess að sitja í stjórn Fíladelfíu og starfa sem formaður rekstrarráðs safnaðarins.
Aðild að lekamálinu
[breyta | breyta frumkóða]Gísli Freyr var dæmdur í átta mánaða skilorðsbundið fangelsi fyrir þátt sinn í Lekamálinu svokallaða, en hann hafði þá starfað sem aðstoðarmaður Hönnu Birnu Kristjánsdóttur innanríkisráðherra í eitt og hálft ár. Lekamálið hófst í nóvember 2013 þegar minnisblaði um hælisleitandann Tony Omos var lekið úr innanríkisráðuneytinu. Fréttablaðið birti forsíðufrétt sem byggir á minnisblaðinu 20. nóvember 2013, en svipaðar fréttir birtast á Vísi og vef Morgunblaðsins. Þegar leitað var skýringa hjá innanríkisráðuneytinu á lekanum varð Gísli Freyr fyrir svörum og útilokaði ekki að óbreyttir starfsmenn ráðuneytisins hefðu getað lekið minnisblaðinu. Seinna sendi hann frá sér tilkynningu þar sem hann dró þessa fullyrðingu til baka og sagði að ekkert benti til þess að gögn hefðu verið send óviðkomandi aðilum.[3]
Ríkissaksóknari gaf út ákæru á hendur Gísla Frey 15. ágúst 2014, þar sem hann var ákærður fyrir brot gegn þagnarskyldu í starfi sínu. Var hann í framhaldinu sendur í leyfi frá störfum og Hanna Birna baðst undan þeim starfsskyldum sínum sem snéru að dómsmálum, þar sem líklegt væri að hún yrði kölluð til sem vitni.[4]
Gísli hélt lengst af staðfastlega fram sakleysi sínu í málinu. Strax og ákæra var gefin út sendi hann frá sér tilkynningu þar sem hann sagðist vera handviss um að hann yrði sýknaður af sökum þeim sem á hann voru bornar [5] Þegar málið var þingfest fyrir héraðsdómi gerði Gísli kröfu um frávísun og gagnrýndi alla málsmeðferðina harðlega, sagði m.a. vera greinilegt að ákæruvaldið hefði ekki hugmynd um það hvernig upplýsingarnar hefðu ratað í hendur fjölmiðla þrátt fyrir margra mánaða ítarlega rannsókn.[6] Vakti nokkra athygli að hluti málsvarnar Gísla byggðist á því að saksóknari væri vanhæfur til að fjalla um málið þar sem hann hafi smellt á „like“ við frétt af málinu á Facebook.[7]
Saksóknari kynnti ný gögn fyrir verjanda Gísla Freys 10. nóvember 2014, sem honum þóttu sýna með óyggjandi hætti að Gísli hefði átt við minnisblaðið og komið því til fjölmiðla.[8] Daginn eftir fór Gísli á fundi Hönnu Birnu og játaði sök í málinu fyrir henni. Í framhaldi af játningu Gísla Freys var honum umsvifalaust vikið úr starfi aðstoðarmanns.[9] Þá um kvöldið ítrekaði Gísli Freyr játningu sína í viðtali við Kastljósið, þar sem hann sagðist vera kominn á ákveðna endastöð með lygi sem hófst ári fyrr og ekki geta samvisku sinnar neitað sök lengur.[10]
Gísli Freyr hlaut átta mánaða fangelsisdóm, skilorðsbundinn til tveggja ára, eftir að hafa gengist við sakargiftum 12. nóvember 2014.[11]
Tilvísanir
[breyta | breyta frumkóða]- ↑ „Gísli Freyr Valdórsson ráðinn aðstoðarmaður innanríkisráðherra“, heimasíða innanríkisráðuneytisins.
- ↑ „Keypti Viðskiptablaðið á krónu“ Geymt 16 febrúar 2015 í Wayback Machine, dv.is, 27. janúar 2009.
- ↑ „Einhverjir gætu verið að búa til einhverja punkta hjá sér“[óvirkur tengill], DV, 20. júní 2014.
- ↑ „Gísli Freyr ákærður: Hanna Birna biðst undan skyldum sínum“, vísir.is, 15. ágúst 2014.
- ↑ „Yfirlýsing frá Gísla Frey: Segist fullviss um að verða sýknaður“, vísir.is, 15. ágúst 2014.
- ↑ „Gísli Freyr krefst frávísunar og gagnrýnir ákæru harðlega“ Geymt 13 janúar 2015 í Wayback Machine, Kjarninn, 17. september 2014.
- ↑ „Sagði saksóknara vanhæfan vegna „like““[óvirkur tengill], RÚV, 1. október 2014.
- ↑ „Segir ný gögn skýra sinnaskipti Gísla“, ruv.is, 12. nóvember 2014.
- ↑ „Gögn sýna fram á rangar staðhæfingar Gísla Freys“, Fréttablaðið, 12. nóvember 2014.
- ↑ „Gísli Freyr: „Mér líður auðvitað ömurlega““ Geymt 14 nóvember 2014 í Wayback Machine, RÚV, 11. nóvember 2014.
- ↑ „Gísli Freyr dæmdur í átta mánaða fangelsi“ Geymt 14 nóvember 2014 í Wayback Machine, Kjarninn, 12. nóvember 2014.