Eyrarsundsbrúin
Eyrarsundsbrúin er blönduð bita- og stagbrú sem tengir saman Danmörku og Svíþjóð yfir Eyrarsund milli Amager og Skáns, rétt sunnan við Málmey. Eyrarsundsgöngin liggja frá Kastrup á Amager fyrsta hluta leiðarinnar yfir á Piparhólma þar sem brúin byrjar. Yfir brúna liggja hraðbraut og tvær járnbrautir.
Brúin er samtals 7,8 km löng og er í þremur hlutum. Hábrúin er 1092 m löng stagbrú og sitthvorum megin eru tvær bitabrýr, 3014 metrar vestan megin sem tengist Danmörku og 3739 metrar austan megin sem tengist Svíþjóð. Með göngunum og þeim hluta sem liggur yfir Piparhólma er samgöngumannvirkið í heild sinni 15,9 km að lengd.
Smíði brúarinnar hófst 18. október 1995 og lauk 14. ágúst 1999 og var hún vígð 1. júlí árið 2000 af Karli 16. Gústafi Svíakonungi og Margréti Þórhildi Danadrottningu.
