Hengibrú

Iðubrú, hengibrú yfir Hvítá í Árnessýslu.

Golden Gate-brúin, yfir „Gullna hliðið“, sem tengir San Francisco-flóa við Kyrrahafið.

Hengibrú er ein gerð brúar, þar sem brúargólfið eða brautin, hangir í burðarköplum sem festir eru í akkeri við báða enda. Hengibrýr í frumstæðri mynd eru eflaust nokkur þúsund ára gamlar, og eru dæmi um slíkar brýr í Kína á 2. öld fyrir Krist.

Á 19. öld kom fram sú hugmynd að lyfta burðarköplunum með háum turnum, eða stöplum, og má segja að þá hafi komið fram hengibrýr í nútímamerkingu. Með tækniframförum á síðustu áratugum hefur tekist að byggja lengri hengibrýr en áður var mögulegt. Er þar bæði verið að uppfylla ákveðnar þarfir í samgöngum, en einnig að fullnægja metnaði verkfræðinga og þjóða, með því að fara að ystu mörkum þess sem er tæknilega mögulegt. Auk þess eru hengibrýr oft glæsileg mannvirki.

Lengstu hengibrýr heims

Hengibrýr eru oft flokkaðar eftir því hvað þær spanna langt haf milli meginstöpla. Lengstu hengibrýr í heimi eru nú:

1. 1915 Çanakkale-brúin: 2023 metrar, vígð 2022
2. Akashi-Kaikyo-brúin: 1991 metrar, vígð 1998
3. Yangsigang-brúin: 1700 metrar, vígð 2019
4. Xihoumen-brúin: 1650 metrar, vígð 2007
5. Stórabeltisbrúin: 1624 metrar, vígð 1998
6. Osman Gazi-brúin: 1550 metrar, vígð 2016
7. Yi Sun-sin-brúin: 1545 metrar, vígð 2012
8. Runyang-brúin: 1490 metrar, vígð 2005
9. Fjórða Nanjing Yangtze-brúin: 1490 metrar, vígð 2012
10. Humber-brúin: 1410 metrar, vígð 1981