Charles Gauldrée-Boilleau
Charles Gauldrée-Boilleau (1866–1901) var barón frá Frakklandi sem kom til Íslands í lok 19. aldar og hafði tölverð áhrif á bæjarlífið í Reykjavík. Charles kom til Íslands árið 1898, en ástæður þess eru að mörgu leyti huldar. Charles bjó síðan lengi í búi sínu að Hvítárvöllum í Borgarfirði. Hann var jafnan kenndur við bæinn síðan og kallaður „baróninn á Hvítárvöllum“. Hann hóf þar búskap með stórt mjólkurbú. Hann rak líka stórt fjós þar sem nú er Barónsstígur í Reykjavík, nefndur eftir honum.[1]
Faðir Charles, Charles-Henri-Philippe Gauldrée-Boilleau(fr), var franskur og hafði verið sendiherra Frakka í Líma í Perú, en móðir hans var dóttir öldungaráðsmanns í Bandaríkjunum. Charles lauk námi við Eton-skóla í Englandi. Hann var mikill málamaður og gat talað 7 tungumál þegar hann kom til Íslands, og íslensku lærði hann á ótrúlega stuttum tíma. Charles lék á selló og hélt tvenna tónleika í Reykjavík.
Hann keypti sér húsið að Laugavegi 90 þar sem hann hélt sig á vetrum. Þar sem kúabúskapurinn gekk ekki eins vel fjárhagslega og hann ætlaði, hóf hann að undirbúa stofnun útgerðarfélags í togaraútgerð (Vídalínsútgerðin) sem var í rekstri eitt sumar, 1899. Alþingi hafnaði því að samþykkja sérleyfi handa þessari útgerð. Hann var þá félítill í London þar sem hann framdi sjálfsmorð með byssu í lestarvagni milli jóla og nýárs árið 1901.[2]
Þórarinn Eldjárn skrifaði um hann bókina Baróninn.
Tilvísanir
[breyta | breyta frumkóða]- ↑ Svavar Sigmundsson (3.6.2004). „Af hverju kallast Skuggahverfi svo? En Barónsstígur og Grjótaþorp?“. Vísindavefurinn.
- ↑ Árni Óla (1936). „Baróninn á Hvítárvöllum“. Lesbók Morgunblaðsins. 11 (1): 1–4.
Þetta æviágrip sem tengist Frakklandi er stubbur. Þú getur hjálpað til með því að bæta við greinina.