Brattahlíð

Úr Wikipediu, frjálsa alfræðiritinu
Endurbyggð Þjóðhildarkirkja, Eiríksfjörður í baksýn. (Ljósmyndari Hamish Laird)

Brattahlíð var bær Eiríks rauða í Eystribyggð á Grænlandi. Samkvæmt Grænlendinga sögu og Landnámubók byggði Eiríkur Brattahlíð um 985. Þar er nú bærinn Qassiarsuk en hann er um 5 km frá flugvellinum í Narsarsuaq handan Eiríksfjarðar og um 40 km norðaustan við aðalþorpið Narsaq. Bæjarstæðið er í góðu skjóli vestan Eiríksfjarðar um það bil 96 km frá hafi. Afkomendur Eiríks bjuggu í Brattahlíð fram yfir miðja 15. öld.

Fyrsta kirkja Grænlands (og þar með vesturheims), Þjóðhildarkirkja, stóð hér. Fornleifafræðingar hafa stundað umfangsmiklar rannsóknir við Brattahlíð. Auk Þjóðhildarkirkju hefur meðal annars verið grafið upp fjós sem var 53 metra langt og 14 metra breitt með 1,5 metra þykkum hlöðnum steinveggjum og þar fyrir utan torfhleðsla til einangrunar. Flórinn var lagður stórum steinhellum og skilveggir milli bása gerðir úr stórum flötum steinum utan einn sem herðablað úr hval var notað í.

Land Brattahlíðar er enn eitt besta landbúnaðarsvæði Grænlands með mikla gróðursæld. Þar og á nágrannabæjum er nú stunduð mikil sauðfjárrækt eins og á dögum Grænlendinga hinna fornu.

Þing Grænlendinga var haldið í Brattahlíð en ekki er vitað nákvæmlega hvar sjálfur þingstaðurinn var.

Tengill[breyta | breyta frumkóða]