Offenbach am Main

Úr Wikipediu, frjálsa alfræðiritinu
Skjaldarmerki Offenbach Lega Offenbach í Þýskalandi
Upplýsingar
Sambandsland: Hessen
Flatarmál: 44,9 km²
Mannfjöldi: 130.000 (2019)
Þéttleiki byggðar: 2.605/km²
Hæð yfir sjávarmáli: 98 m
Vefsíða: www.offenbach.de
City Tower í Offenbach

Offenbach am Main er fimmta stærsta borgin í þýska sambandslandinu Hessen með 130 þúsund íbúa (2019). Borgin er iðnaðarborg en hefur ætíð staðið í skugganum á Frankfurt. Mikill rígur er milli þessara nágrannaborga, meðal almennings, fyrirtækja og sérstaklega í íþróttum. Aðalstöðvar þýsku veðurstofunnar eru staðsettar í Offenbach.

Lega[breyta | breyta frumkóða]

Offenbach liggur við ána Main og er hluti af stórborgarsvæði Frankfurts. Næstu borgir eru Frankfurt am Main til vesturs (samvaxnar), Darmstadt til suðurs (20 km) og Würzburg til suðausturs (60 km).

Skjaldarmerki[breyta | breyta frumkóða]

Skjaldarmerki Offenbach sýnir hvíta eik með fimm akörnum á bláum fleti. Eikin er tákn um ríkisskóginn Reichsforst Dreieich sem borgin var áður fyrr hluti af.

Orðsifjar[breyta | breyta frumkóða]

Borgin hét upphaflega Ovenbach og er dregið af mannanafninu Ovo eða Offo. Merkingin er því lækurinn hans Ovo (bach = lækur).[1]

Söguágrip[breyta | breyta frumkóða]

977 kemur Offenbach fyrst við skjöl, en þá var Otto II keisari þar á bæ. Næstu aldir kemur bærinn lítið við sögu og skiptir nokkrum sinnum um eigendur. 1372 leigði Filippus greifi af Falkenstein bæinn til Frankfurt fyrir 1000 gyllini. 1486 skipti bærinn aftur um eigendur, er greifarnir af Isenburg erfðu bæinn og reistu sér kastala þar. 1559 urðu siðaskiptin í bænum. Í 30 ára stríðinu hertók bæverskur keisaraher Offenbach. 1631 mætti Gústaf Adolf Svíakonungur á svæðið og náði að hrekja Bæjara burt. Gústaf Adolf lét gera umsátur um Frankfurt meðan hann sat í Offenbach. Þegar Frankfurt gafst upp, tók Svíakonungur við uppgjafabréfi þeirra í kastalanum í Offenbach. 1698 tóku greifarnir við mörgum húgenottum, sem reistu sér ný hverfi í bænum. Það var upphafið að miklum handverksiðnaði, til dæmis leðuriðnaði. Í kjölfarið stækkaði bærinn ört. 1815 úrskurðaði Vínarfundurinn að hrifsa bæinn úr höndum greifanna frá Isenburg sökum stuðnings þeirra við Napoleon. Bærinn varð til skamms tíma eign Austurríkis, en varð brátt hluti af stórhertogadæminu Hessen-Nassau. Á þeim tíma mun Offenbach hafa verið orðin að borg. 1920 hertóku Frakkar borgina í einn mánuð en Frakkar réðu þá Rínarlöndunum. Í heimstyrjöldinni síðari varð Offenbach fyrir þó nokkrum loftárásum. 36% borgarinnar eyðilagðist. 1954 fór íbúatala borgarinnar yfir 100 þús. 1997 hélt borgin upp á 1000 ára afmæli sitt með stórhátíð.

Íþróttir[breyta | breyta frumkóða]

Aðalknattspyrnulið borgarinnar er Kickers Offenbach sem leikur oftar en ekki í 2. deild. Liðið varð bikarmeistari 1970. Þekktasti leikmaður félagsins var Rudi Völler, seinna þjálfari þýska landsliðsins.

Frægustu börn borgarinnar[breyta | breyta frumkóða]

  • (1901) Bernhard von Brentano rithöfundur

Byggingar og kennileiti[breyta | breyta frumkóða]

Rumpenheimer-kastali
Isenburg-kastalinn
  • Isenburg-kastalinn er aðsetur Isenburg greifaættarinnar í borginni. Hann var reistur á 16. öld og var smíðinni lokið 1559. Aðeins 6 árum eftir vígsluna brann kastalinn og var reistur á ný og hefur staðið óhaggaður fram til dagsins í dag. Í 30 ára stríðinu bjó Gustav Adolf II Svíakonungur í kastalanum og reyndi að fá borgarherrana í Frankfurt til að gefast upp. 1741 var haldin þjóðleg ráðstefna í kastalanum þar sem ríkisstjórnarskráin var endurnýjuð. 1900 eignaðist stórhertogadæmið Hessen-Darmstadt kastalann og er eign Hessen í dag. Kastalinn skemmdist nokkuð í loftárásum seinna stríðsins, enda staðsettur í miðborginni, og stóðu viðgerðir allt til 1950.
  • Rumpenheimer Schloss er annar kastali í borginni. Elstu hlutar hans voru reistir 1678 sem landvilla af ráðherra í stjórninni í greifadæminu Hanau. En 1768 seldu afkomendur hans kastalann greifadæminu Hessen-Kassel. Greifarnir þar stækkuðu landvilluna í kastala 1787-88. 1839 var svo garðurinn stóri lagður í kringum kastalann og ýmis garðmannvirki bættust við. Á 19. öld hittust Franz I keisari Austurríkis og Alexander III Rússakeisari til viðræðna í kastalanum. Danakonungarnir Kristján IX og Friðrik VII Prússakonungur. 1863 var Vilhjálmi frá Schleswig-Holstein-Glücksburg boðin gríska krúnan í þessum kastala, sem hann þáði. En eftir 1880 flutti íbúar kastalans á brott og stóðu byggingarnar þá auðar og voru ekki lengur notaðar sem aðsetur greifaætta. Í loftárásum 1943 skemmdist miðhlutinn nokkuð, en kastalinn var þá enn auður og í niðurníslu. Það var ekki fyrr en á 9. áratugnum að hliðarálmunum var breytt í íbúðir. Miðhlutinn var ekki lagfærður fyrr en árið 2002. Kastalinn í heild sinni er í dag eins og venjuleg íbúðarblokk.

Tilvísanir[breyta | breyta frumkóða]

  1. Geographische Namen in Deutschland. Duden. 1993. Bls. 204.

Heimildir[breyta | breyta frumkóða]

Fyrirmynd greinarinnar var „Offenbach am Main“ á þýsku útgáfu Wikipedia. Sótt mars 2010.