Wikipedia:Fæðingar- og dánardagur

Ákveðin regla gildir um það hvernig fæðingar- og dánardagur er ritaður í greinar. Þetta er ekki stjórnarstefna Wikimedia Foundation heldur hefð sem að hefur verið ákveðin og náð víðtækri sátt meðal notenda íslensku Wikipediu.

Í æviágripum ætti að geta fæðingar- og dánardags viðkomandi í upphafi greinarinnar, ef þeir eru þekktir, með eftirfarandi hætti:

• Plútarkos (46 – 127)
• Charles Darwin (12. febrúar 1809 – 19. apríl 1882)
  • Athugið að (a) það er ekki komma á milli mánaðardags og árs, (b) það er stafabil milli ártals/dagsetningar og bandstriks, og (c) notað er bandstrik (–) en ekki mínus-merki (-) og ekki þankastrik/langstrik (—).
  • Einnig má rita:
    • Charles Darwin (fæddur 12. febrúar 1809, dáinn 19. apríl 1882), eða
    • Charles Darwin (f. 12. febrúar 1809, d. 19. apríl 1882)
    • Einnig mætti rita „látinn“ í stað „dáinn“
  • Gætið þess að blanda ekki saman ólíkum leiðum, t.d.: (fæddur 12. febrúar 1809 – 19. apríl 1882)
  • Ef fæðingar- eða dánarstaður er þekktur má geta hans. Til dæmis „(12. febrúar 1809 í Shrewsbury í Shropshire á Englandi – 19. apríl 1882 í Downe í Kent á England)“. Einnig má færa fæðingar- og dánarstað yfir í meginmálið svona: „(12. febrúar 1809 – 19. apríl 1882) [...] Hann fæddist í Shrewsbury í Shropshire á Englandi [...] og lést í Downe í Kent á England.“

Ártöl fyrir og eftir okkar tímatal:

• Ártöl fyrir okkar tímatal eru gefin til kynna með skammstöfuninni „f.Kr.“ (fyrir Krist):
  • Sókrates (469 f.Kr. – 399 f.Kr.)
  • Einnig mætti rita: (469 – 399 f.Kr.)
  • Í staðinn fyrir skammstöfunina „f.Kr.“ má einnig nota skammstöfunina „f.o.t.“ (fyrir okkar tímatal) en gæta verður þess að nota sömu skammstöfunina alls staðar í greininni.
• Ef fæðingarár er fyrir okkar tímatal en ekki dánarárið skal það gefið til kynna með skammstöfuninni „e.Kr.“ (eftir Krist):
  • Publius Ovidius Naso (43 f.Kr. – 17 e.Kr.)

Lifandi fólk:

• Þannig skal geta fæðingarárs lifandi fólks:
  • Serena Williams (fædd 26. september 1981), eða
  • Serena Williams (f. 26. september 1981)
    • Athugið að það er ekki gert svona: (26. september 1981–)

Eitt ártal:

• Þegar einungis dánarár er þekkt skal þess getið með eftirfarandi hætti:
  • Offa (dáinn 26. júlí 796), eða
  • Offa (d. 26. júlí 796)
• Þegar dánarár er óþekkt (en viðkomandi er örugglega látinn)
  • Robert Menli Lyon (fæddur 1789, dánarár óþekkt)

Einungis valdatími þekktur:

• Þegar einungis valdatími er þekktur.
  • Rameses III (við völd 1180 f.Kr. – um 1150 f.Kr.)

Ónákvæm ártöl:

• Á undan ártölum sem eru ekki nákvæm skal rita „um“:
  • Genghis Khan (um 1162 – 18. ágúst 1227)
• Þegar bæði ártölin eru ónákvæm er „um“ ritað á undan hvoru ártali fyrir sig:
  • Dionysius Exiguus (um 470 – um 540)
• Þegar vitað er að viðkomandi var uppi á tilteknu ári eða tímabili:
  • Osmund (fl. 760–772)
    • „[[floruit|fl.]]“ er notað til að tengja í greinina floruit, sem útskýrir hugtakið.