Vesturgata
_(cropped).jpg)
Vesturgata er gata í vesturbæ Reykjavíkur. Hún liggur frá Aðalstræti í austri til Ánanausta í vestri. Flest húsin við götuna eru íbúðarhús, en þar eru einnig nokkur fyrirtæki.
Vesturgata dregur nafn sitt af því að hún liggur í vesturátt frá miðbæ Reykjavíkur. Hún hét áður Hlíðarhúsastígur, eftir kotinu Hlíðarhúsum sem áður stóð við götuna. Síðar var hún kölluð Læknisgata, vegna húss sem landlæknir bjó á Hlíðarhúsavelli (nú Ránargata 13), en þetta nafn festi sig aldrei jafn mikið í sessi meðal Vesturbæinga, sem héldu áfram að kalla götuna Hlíðarhúsastíg, eða einfaldlega Stíginn. Nafnið Vesturgata náði einnig seint fótfestu; langt fram yfir aldamótin 1900 töluðu menn enn um að fara „vestur á Stíg“.
Fræg hús
[breyta | breyta frumkóða]Við Vesturgötu standa nokkur sögufræg hús. Þar á meðal er steinhús frá árinu 1915 við Vesturgötu 5, sem hýsti um árabil Landlæknisembættið. Ýmsir listamenn og rithöfundar hafa einnig búið eða starfað við götuna, sem er hluti af hinu eldra og sögufrægara borgarsvæði Reykjavíkur.
Vesturgata 2 eða Bryggjuhúsið var reist árið 1862 og hefur þar farið fram ýmis starfsemi. Sama ár var Byggingin Glasgow (Vesturgata 5a) reist af skoska kaupmanninum P.L. Henderson. Það var stærsta hús á Íslandi þegar það var byggt. Húsið brann árið 1903.
Bankarán
[breyta | breyta frumkóða]Vesturgata hefur í þrígang verið vettvangur vopnaðra bankarána. Hinn 3. janúar 1986 var ráðist inn í útibú Landsbankans að Vesturgötu 16, í því sem talið er eitt fyrsta vopnaða bankaránið í íslenskri sögu. Ræninginn flúði með fjármuni en var síðar handtekinn. Þann 18. desember 1995 var aftur framið vopnað rán í útibúi Búnaðarbankans við götuna, þar sem þrír menn rændu tæplega tveimur milljónum króna. Þrátt fyrir umfangsmikla rannsókn hefur það mál aldrei verið upplýst og er enn óleyst.[1] Þann 17. nóvember 2003 átti þriðja bankaránið sér stað, þegar maður vopnaður hnífi rændi fé úr útibúi Búnaðarbankans að Vesturgötu 54. Ræninginn flúði af vettvangi og var leitað með aðstoð vitna og myndavéla, án árangurs.[2]
Tilvísanir
[breyta | breyta frumkóða]- ↑ Pálsson, Stefán Árni (12 júní 2013). „Þrjú óupplýst bankarán á Íslandi - Vísir“. visir.is. Sótt 12 júlí 2025.
- ↑ „Rán í Búnaðarbankanum á Vesturgötu“. www.mbl.is. Sótt 12 júlí 2025.
