Ánanaust

Ánanaust eru gata í Vesturbænum í Reykjavík sem liggur meðfram sjónum frá Hringbraut í suðvestri til Mýrargötu í norðaustri.

Landmegin við götuna eru fjölbreytt íbúðarhús og fyrirtæki, en sjávarmegin eru stór skólpdælustöð, bensínstöð og móttökustöð Sorpu. Eins og Snorrabraut var Ánanaust upphaflega hluti af Hringbraut.

Ánanaust á uppruna sinn sem naust frá Vík (sem var fyrrum nafn á Reykjavík), og síðar var svæðið hjáleiga frá býlinu Hlíðarhúsum. Bæirnir sem stóðu þar áður voru nærri því svæði sem nú er við gatnamót Ánanausta og Vesturgötu. Síðasti torfbærinn á svæðinu var rifinn árið 1930 og síðasta húsið 1940, vegna mikilla gatnaframkvæmda sem urðu til þess að svæðið breyttist mikið á þessum árum.

Frá árunum 1905 til 1954 starfaði á svæðinu Sóttvarnarhús, staðsett í Ánanaustum 11, sem gegndi mikilvægu hlutverki í baráttu við smitsjúkdóma á tímum þar sem faraldssjúkdómar voru algengari.

Tilvísanir

  Þessi Reykjavíkurgrein er stubbur. Þú getur hjálpað til með því að bæta við greinina.