Theodóra Thoroddsen

Úr Wikipediu, frjálsa alfræðiritinu
(Endurbeint frá Theódóra Thoroddsen)
Jump to navigation Jump to search

Theodóra Thoroddsen (f. 1. júlí 1863, d. 23. febrúar 1954) hét fullu nafni Theodóra Friðrika Guðmundsdóttir Thoroddsen. Hún var skáld og er einkum þekkt fyrir þulur sínar.

Ævi[breyta | breyta frumkóða]

Theodóra fæddist á heimili sínu á Kvennabrekku í Dölum. Foreldrar hennar voru Guðmundur Einarsson prestur og Alþingismaður (móðurbróðir Matthíasar Jochumssonar skálds), og Katrín Ólafsdóttir dóttir Sívertsens í Flatey. Hjónin eignuðust 15 börn en Theodóra var yngst þeirra þriggja sem náðu fullorðinsaldri. Hin tvö voru Ásthildur og Ólafur.

Theodóra stundaði nám í Kvennaskólanum í Reykjavík og útskrifaðist 1879. Hún giftist Skúla Thoroddsen lögfræðingi og flutti til Ísafjarðar þegar maður hennar varð sýslumaður þar. Hann var dæmdur frá embætti 1893 en þau bjuggu áfram á Ísafirði í nokkur ár og ráku þar verslun. Árin 1901 fluttu þau suður, fyrst til Bessastaða en síðan til Reykjavíkur árið 1908. Skúli og Theodóra eignuðust þrettán börn. Þau voru: Unnur húsfreyja, Guðmundur prófessor og yfirlæknir, Þorvaldur lést í frumbernsku, Skúli yfirdómslögmaður og alþingismaður, Þorvaldur fór til Vesturheims, Kristín Ólína yfirhjúkrunarkona og skólastýra, Katrín læknir, alþingismaður og bæjarfulltrúi, Jón lögfræðingur og skáld, Ragnhildur húsfreyja, Bolli borgarverkfræðingur, Sigurður verkfræðingur og alþingismaður, Sverrir bankafulltrúi, María Kristín húsfreyja.

Þulur Theodóru voru fyrst gefnar út 1916. Guðmundur Thorsteinsson (Muggur), systursonur hennar, myndskreytti. Þær voru endurútgefnar 1938 (Sigurður Thoroddsen myndskreytti útgáfuna þá ásamt Muggi), 1950, 1981 og 2000. Ritsafn Theodóru kom út 1960. Um útgáfuna sá Sigurður Nordal. Eins og gengur (smásögur) kom út 1920.

Kvæði, stökur og sagnir Theodóru eru birtar víða, meðal annars í Mánaðarriti Lestrarfélags kvenna í Reykjavík (1911-1931). Hún þýddi sögur úr öðrum málum og safnaði einnig þjóðsögum. Islandsk folketru var útgefin í Kristjaníu 1924, eftir handriti hennar. Theodóra var einnig mikilvirk og listfeng hannyrðakona. Sýningar hafa verið haldnar á verkum hennar.

Verk[breyta | breyta frumkóða]

  Þetta æviágrip sem tengist bókmenntum er stubbur. Þú getur hjálpað til með því að bæta við greinina.