Sturla Jónsson

Sturla Hólm Jónsson (f. í Reykjavík 4. nóvember 1966) er íslenskur vörubílsstjóri og stjórnmálamaður. Eig­in­kona hans heitir Aldís Erna Helga­dóttir og eiga þau þrjú börn. Sturla ólst upp í Breiðholti í Reykjavík og var nemandi í Fellaskóla. Hann hóf atvinnuþátttöku strax að loknu grunnskólaprófi, aðeins 15 ára gamall. Sturla stofnaði sinn eigin rekstur árið 1998 sem hann stundaði til ársins 2008.

Ferill

Innkoma Sturlu inn í þjóðfélagsumræðuna

Sturla varð þjóðþekktur í kjölfar mótmæla vörubílsstjóra á íslandi árið 2008 og var áberandi í Búsáhaldabyltingunni sem hófst í kjölfar efnahagshrunsins haustið 2008. Sturla tapaði miklum fjármunum í hruninu og fluttist í kjölfarið tímabundið til Noregs, líkt og margir gerðu á þeim tíma.

Sturla var ein af aðalpersónum myndarinnar „Guð blessi Ísland“, í leikstjórn Helga Felixsonar sem frumsýnd var í október 2009 og fjallaði um afleiðingar hrunsins.

Mótmæli 2008

Mótmæli vörubílsstjóra

Mótmæli vörubílsstjóra hófust 27. mars 2008 og var Sturla skipuleggjandi mótmælanna. Mótmælin lýstu sér í því að atvinnubílstjórar lögðu vörubílum sínum á stórum umferðaræðum á höfuðborgarsvæðinu og hindruðu þannig alla umferð. Gengu þau út á að mótmæla of háum olíusköttum, of stífum reglum um hvíldartíma atvinnubílstjóra og þess krafist að nýjar reglur um endurnýjun á meiraprófsréttindum verði endurskoðaðar.

Aðgerðaröð mótmæla vörubílsstjóra

Mótmælin stóðu yfir daglega frá 27. mars til 1. apríl 2008 á nokkrum stöðum á landinu. 4. apríl mótmæltu vörubílstjórar á Selfossi og síðan varð hlé á aðgerðum þangað til 23. apríl þegar fjöldi mótmælenda kom saman við Rauðavatn í Reykjavík og stöðvaði þar umferð.

Aðgerðir lögreglu

Lögreglan mætti á staðinn, vopnuð óeirðarbúnaði og kom til átaka milli lögreglu og mótmælenda sem endaði með því að 21 mótmælandi var handtekinn og lögreglan sprautaði piparúða á fjöldann. Ljósmynd af atburðinum var valin fréttamynd ársins 2008.

Slæst í kekki milli mótmælenda og lögreglunnar

Var steinum og eggjum m.a. kastað í lögreglumenn með þeim afleiðingum að einn slasaðist þegar hann fékk grjót í höfuðið. Þá lagði lögregla hald á 16 ökutæki þennan dag. Segja má að hámæli mótmæla vörubílstjóra hafi verið þennan dag og lauk þeim alfarið 25. apríl þegar nokkur ungmenni mótmæltu við gagnamót Kringlumýrabrautar og Miklubrautar.

Þátttaka Sturlu í Búsáhaldabyltingunni

Sturla tók virkan þátt í Búsáhaldabyltingunni og steig á stokk á Austurvelli laugardaginn 1. nóvember 2008 og talaði til mótmælenda sem þá voru á annað þúsund. Allar götur síðan hefur Sturla verið áberandi í þjóðfélagsumræðunni og haldið uppi baráttu um bætt kjör lántakenda.

Framboð Sturlu Jónssonar

Stjórnmálamaðurinn Sturla

Frá haustinu 2008 hefur hann fjórum sinnum farið í framboð, þrisvar til Alþingis og einu sinni til embættis forseta Íslands. Málefni lántakenda hafa verið hans helsta baráttumál allan hans stjórnmálaferil og á kosningavef RÚV segir hann í aðdraganda Alþingiskosninga 2016:

„Ég hóf þá baráttu sem enn sér ekki fyrir endann á sem sneri að lögmæti lána, hegðun lánastofnana gagnvart viðskiptavinum sínum með fulltingi sýslumanna, úrræðaleysis og afskiptaleysis annarra stjórnvalda gagnvart þeim."

Alþingiskosningar 2009

Í kosningum til Alþingis vorið 2009 bauð Sturla sig fram sem oddviti Frjálslynda flokksins í Reykjavíkurkjördæmi suður. Flokkurinn fékk 700 atkvæði í kjördæminu, eða 2% greiddra atkvæða en náðu ekki kjörnum manni á þing.

Alþingiskosningar 2013

Í Alþingiskosningunum árið 2013 bauð hann fram undir eigin nafni, en áður hét flokkurinn Framfaraflokkurinn. Framboð Sturla Jónssonar fékk listabókstafinn K og var í framboði í Reykjavíkurkjördæmi suður. Sturla bjó sjálfur í Reykjavíkurkjördæmi norður og gat því sjálfur ekki kosið eigið framboð. Framboðið hlaut 222 atkvæði, eða 0,1% og náði ekki manni inn á þing.

Forsetakosningar 2016

Sturla var frambjóðandi í forsetakosningunum árið 2016 og hlaut 6.446 atkvæði, eða 3,5% atkvæða. Hann vakti athygli fyrir að fara í eigin persónu hringinn í kringum landið að safna meðmælum, sem hann lauk við að safna fyrstur allra frambjóðenda og safnaði alls 2.729 gildum meðmælum þegar lögbundið lágmark er 1.500. Í Sunnlendingafjórðungi safnaði hann 2.214 meðmælendum, í Austfirðingafjórðungi 105 meðmælendum, í Norðlendingafjórðungi 310 meðmælendum og í Vestfirðingafjórðungi 100 meðmælendum.

Alþingiskosningar 2016

Sturla Jónsson tilkynnti þann 21. ágúst 2016 að hann myndi verða í framboði fyrir Dögun í þingkosningunum 29. október 2016. Þann 13. september var síðan tilkynnt að hann yrði oddviti flokksins í Suðurkjördæmi. Flokkurinn hlaut 611 atkvæði í kjördæminu, eða 2,3% sem var mun hærra en flokkurinn hlaut á landsvísu (1,7%). Flokkurinn náði engum manni kjörnum á þing.

Tilvísanir

  Þetta æviágrip er stubbur. Þú getur hjálpað til með því að bæta við greinina.