Stjörnustríð

Úr Wikipediu, frjálsa alfræðiritinu
(Endurbeint frá Star Wars)
Stökkva á: flakk, leita
Merki myndanna.
Þessi grein fjallar um kvikmyndasyrpuna í heild. Stjörnustríð: Ný von fjallar um fyrstu myndina.

Stjörnustríð er kvikmyndasyrpa sem upphaflega var sköpuð af bandaríska leikstjóranum George Lucas. Fyrsta myndin, sem hét einfaldlega Stjörnustríð, var frumsýnd 15. maí 1977 og naut mikilla vinsælda. Hún fékk síðar nafnið Ný von. Á eftir henni komu tvær framhaldsmyndir, Gagnárás keisaradæmisins (1980) og Jedinn snýr aftur (1983). Sextán árum síðar var gerð forsaga í þremur kvikmyndum, Stjörnustríð - Fyrsti hluti: Ógnvaldurinn (1999), Stjörnustríð - Annar hluti: Árás klónanna (2002) og Stjörnustríð - Þriðji hluti: Hefnd Sithsins (2005). Árið 2015 var fyrsta myndin í framhaldsþríleik frumsýnd; Stjörnustríð: Mátturinn vaknar og önnur myndin, Stjörnustríð: Síðasti Jedinn verður frumsýnd í desember 2017.

Tvær kvikmyndir hafa verið gerðar sem falla utan við röðina: teiknimyndin Stjörnustríð: Klónastríðin (2008), og Rogue One: Stjörnustríðssaga (2016). Mikið af bókum, myndasögum, tölvuleikjum og hreyfimyndum hefur verið gert, sem fellur allt undir söguheim Stjörnustríðs.

Stjörnustríðsheimurinn[breyta | breyta frumkóða]

Stjörnustríðsmyndirnar gerast á fjarlægri vetrarbraut; allar Stjörnustríðsmyndirnar (og mest af öðrum Stjörnustríðsskáldskap) hefjast á setningunni „Endur fyrir löngu, í fjarlægri vetrarbraut“. Margar plánetur í þessari vetrarbraut eru undir stjórn Geimlýðveldisins sem síðar breyttist í Keisaradæmið.

Þeir öflugustu í Stjörnustríðsheiminum eru Jediriddarar og Sithar. Þeir hafa mesta valdið yfir mættinum og nota yfirleitt geislasverð. Mátturinn gefur handhafa sínum vald til þess að m.a. ýta og toga hluti án snertingar við þá; Jediriddarar nota hann yfirleitt á góðan hátt og til að verja sig, en Sithar nota hann oft á verri hátt, til dæmis til að kyrkja fólk og senda frá sér eldingar.

Jediar og Sithar eru mennskir í kvikmyndunum (í söguheiminum eru Sithar sérstök tegund), en aðrar tegundir söguheimsins eru meðal annars vákar, evokar, durar og huttar (t.d. hinn alræmdi Jabba Hutt), mandalorar, rodar og twi'lekar.

Söguþráður[breyta | breyta frumkóða]

Forleikurinn, myndir I, II og III, fjalla um Anakin Skywalker sem Qui-Gon Jinn finnur sem ungan strák á plánetunni Tatooine; Qui-Gonn trúir að Anakin muni skapa jafnvægi milli ljósu og myrku hliða máttarins og hjálpar honum að flýja þrældóm. Jedaráðið spáir því að líf Anakins verði eyðilagt af ótta og hatri, en leyfir þó Obi-Wan Kenobi, lærlingi Qui-Gon, að þjálfa Anakin, eftir að Darth Maul drepur Qui-Gon í lok fyrstu myndarinnar. Á sama tíma er verið að gera árás á plánetuna Naboo, undir stjórn drottningarinnar Padmé Amidala, og Jedarnir eru beðnir um liðsinni. Árásin er hluti af leynilegri áætlun Darth Sidious til að þingmaðurinn Palpatine (sem er hann sjálfur) nái að yfirtaka embætti kanslara lýðveldisins. Myndir II og III fjalla um Anakin sem dregst smám saman að myrku hlið máttarins. Í mynd II berst hann í Klónastríðunum, sem líka eru hluti af áætlun Palpatines, til að fá Anakin yfir að hinni myrku hlið máttarins. Anakin verður ástfanginn af Padmé og þau giftast í leyni. Í mynd III dreymir Anakin draum þar sem hann sér Padmé deyja í barnsnauð. Hann leitar hjálpar og finnur Darth Sidious (Palpatine) í geislasverðsbardaga við Mace Windu, þar sem hann drepur Windu og verður vinur Sidious. Anakin breytir svo nafni sínu í Darth Vader (sem hefur verið íslenskað sem „Svarthöfði“), Sidious sannfærir hann um að hann geti bjargað Padmé. Í lok myndar III særir Obi-Wan Kenobi Anakin með geislasverði í bardaga; á sama tíma deyr Padmé við að fæða tvíburana Luke Skywalker og Leia Skywalker.

Mynd IV, Ný von, hefst 19 árum seinna þar sem Svarthöfði er langt kominn við byggingu Helstirnisins, geimskips sem getur eyðilagt plánetu með einu öflugu geislaskoti. Geimskipinu er ætlað að útrýma bandalagi uppreisnarmanna sem varð til í andstöðu við keisaraveldið. Darth Vader hefur rænt Leiu Skywalker sem hefur stolið teikningum af Helstirninu. Áður nær hún að koma teikningunum undan með því að fela þær í vélmenninu R2D2 sem flýr til plánetunnar Tatooine ásamt vélmennatúlknum C3PO. Vélmennin komast í hendur Luke Skywalker sem með aðstoð Obi-Wan Kenobi og Han Solo bjargar Leiu úr klóm Svarthöfða og kemur teikningunum í hendur uppreisnarmanna. Í lok myndarinnar gera uppreisnarmenn árás á Helstirnið og Luke og R2D2 tekst að sprengja það í loft upp. Í mynd V eru uppreisnarmenn á flótta undan keisaraveldinu. Andi Obi-Wan sendir Luke til Jedimeistarans Yoda til að hann fái þjálfun í notkun máttarins. Á meðan eru Leia og Han svikin í hendur Svarthöfða í Skýjaborg Lando Kalrissian. Svarthöfði lætur hausaveiðarann Boba Fett fá Han, sem hefur verið frystur, svo hann geti selt hann í hendur Jabba Hutt á Tatooine. Luke berst við Svarthöfða sem segir honum að hann sé í raun faðir hans. Svarthöfði sker aðra höndina af Luke sem fellur niður en er bjargað af Leiu og Lando. Í mynd VI bjarga Leia og Luke síðan Han úr klóm Jabba. Keisaraveldið er þá langt komið með smíði nýs Helstirnis. Uppreisnarmennirnir hyggjast gera árás en fyrst verða Leia og Han að aftengja orkuskjöld sem umlykur það frá plánetunni Endor. Svarthöfði nær Luke á sitt vald og berst við hann fyrir framan keisarann. Á síðustu stundu snýst Svarthöfða hugur og hann drepur keisarann en særist við það til ólífis. Luke fer með lík föður síns til Endor þar sem hann fær bálför.

Síðasti þríleikurinn hefst 30 árum eftir lok sjöttu myndarinnar. Luke er horfinn og Frumreglan vinnur að því að endurreisa keisaradæmið. Sonur Leiu og Han, Kylo Ren, er í þjónustu Frumreglunnar þar sem hann gegnir svipuðu hlutverki og afi hans, Svarthöfði, hjá keisaraveldinu. Frumreglan er langt komin með smíði nýs Helstirnis. Skransafnarinn Ray slæst í för með fyrrum stormsveitarmanni Frumreglunnar, Finn, til að koma korti af staðsetningu Luke til uppreisnarmanna. Með aðstoð Han Solo og Chewbacca tekst þeim að sprengja Helstirnið. Í lok myndarinnar finnur Ray Luke á plánetunni Ahch-To.

Kvikmyndir[breyta | breyta frumkóða]

Upprunalegu myndirnar[breyta | breyta frumkóða]

Upprunalegu Stjörnustríðsmyndirnar eru þrjár talsins; Sú fyrsta, Stjörnustríð, kom út árið 1977. Árið 1981 var myndin endurútgefin sem Stjörnustríð - Fjórði hluti: Ný von, sem passar betur inn í nafnakerfi seinni myndanna. Önnur myndin, Gagnárás keisaradæmisins, kom út árið 1980. Árið 1983 kom þriðja myndin, Jedinn snýr aftur, út. Aðalpersónan í þessum þremur myndum var Luke Skywalker, leikinn af Mark Hamill. Aðrar persónur voru meðal annars Han Solo, leikinn af Harrison Ford, Leia prinsessa, leikin af Carrie Fisher og Svarthöfði, leikinn af David Prowse.

Árið 1997 kom út sérstök safnaraútgáfa á VHS með fyrstu þremur myndunum (IV, V og VI). Þar var búið að bæta myndgæðin með tölvutækni, til dæmis voru notuð þrívíddarmódel í staðinn fyrir leikbrúður. Atriðum var líka bætt við og auk þess fylgdi aukaefni með viðtölum og stuttmyndum um tæknileg atriði, eins og að yfirborð Helstirnisins hafi verið búið til úr borðtennisborðum og dóti völdu af handahófi.

Árin 1999-2005 komu þrjár nýjar Stjörnustríðsmyndir út. Þær mynda forsögu hinna myndanna þriggja. Þessar myndir eru Stjörnustríð - Fyrsti hluti: Ógnvaldurinn (1999), Stjörnustríð - Annar hluti: Árás klónanna (2002) og Stjörnustríð - Þriðji hluti: Hefnd Sithsins (2005).

Árið 2012 keypti Disney Corporation framleiðslufyrirtækið Lucasfilm af George Lucas. Ákveðið var að gera þrjár framhaldsmyndir (VII, VIII og IX). Sú fyrsta, Stjörnustríð: Mátturinn vaknar, var frumsýnd árið 2015 og sú næsta verður frumsýnd í desember 2017. Árið 2016 kom út aukamynd (utan við aðalkvikmyndaröðina); Stjörnustríð: Rogue One, sem fjallar um það þegar uppreisnarmenn stela teikningum Keisaraveldisins af Helstirninu í aðdraganda 4. myndarinnar Ný von.

Tónlistin í myndunum er eftir John Williams.

Klónastríðin[breyta | breyta frumkóða]

Árið 2008 kom út teiknimyndin Stjörnustríð: Klónastríðin. Einnig eru til samnefndir teiknimyndaþættir frá 2003 og 2008.

Aðrar myndir[breyta | breyta frumkóða]

Nokkrar aðrar Stjörnustríðsmyndir myndir hafa komið út. Þar má nefna The Star Wars Holiday Special, tveggja tíma jólamynd sem var aðeins sýnd einu sinni í sjónvarpi og aldrei gefin út. Myndin fékk afar slæma dóma hjá gagnrýnendum og aðdáendum myndanna. Einnig hafa komið út myndirnar Caravan of Courage: An Ewok Adventure (1984), Ewoks: The Battle for Endor (1985), The Great Heep (1986) og Lego Star Wars: The Quest for R2-D2 (2009).

Tölvuleikir[breyta | breyta frumkóða]

Fjöldamargir Stjörunstríðstölvuleikir hafa verið gefnir út í gegnum tíðina. Sá fyrsti, The Empire Strikes Back, kom út árið 1982 fyrir Atari 2600-leikjatölvuna. Síðan þá hafa rúmlega 100 tölvuleikir verið gefnir út. Má þar nefna The Old Republic-seríuna, Jedi Knight-seríuna og The Force Unleashed-seríuna.