Joseph Kabila

Úr Wikipediu, frjálsa alfræðiritinu
Joseph Kabila
Joseph Kabila árið 2016.
Forseti Lýðstjórnarlýðveldisins Kongó
Í embætti
26. janúar 2001 – 24. janúar 2019
ForsætisráðherraAntoine Gizenga
Adolphe Muzito
Louis Alphonse Koyagialo (starfandi)
Matata Ponyo Mapon
Samy Badibanga
Bruno Tshibala
VaraforsetiAzarias Ruberwa
Arthur Z'ahidi Ngoma
Abdoulaye Yerodia Ndombasi
Jean-Pierre Bemba (2003–2006)
ForveriLaurent-Désiré Kabila
EftirmaðurFélix Tshisekedi
Persónulegar upplýsingar
Fæddur4. júní 1971 (1971-06-04) (52 ára)
Fizi, Kongó-Léopoldville
StjórnmálaflokkurViðreisnar- og lýðræðisflokkur alþýðunnar
MakiOlive Lembe di Sita (g. 2016)
HáskóliMakerere-háskóli
Þjóðvarnarháskólinn
StarfStjórnmálamaður

Joseph Kabila Kabange (f. 4. júní 1971) er kongóskur stjórnmálamaður sem var forseti Lýðstjórnarlýðveldisins Kongó frá árinu 2001 til ársins 2019. Hann tók við embættinu tíu dögum eftir að faðir hans, forsetinn Laurent-Désiré Kabila, var myrtur af eigin lífvörðum. Hann var sjálfur formlega kjörinn forseti árið 2006[1] og endurkjörinn árið 2011.[2] Á valdaárum sínum þurfti Kabila að glíma við stöðug stríðsátök í austurhluta ríkisins og uppreisnarhreyfingar sem njóta stuðnings ríkisstjórna nágrannaríkjanna Úganda og Rúanda.

Kabila tók við völdum af föður sínum á meðan Kongó var enn í stríði við Úganda og Rúanda. Kabila skrifaði undir friðarsáttmála ásamt leiðtogum hinna ríkjanna árið 2002[3] en vopnuð átök héldu þó lengi áfram eftir að stríðinu lauk á pappírnum og í hluta Kongó er þeim í raun enn ekki lokið.

Á forsetatíð Kabila sankaði fjölskylda hans að sér miklum auðæfum með náttúruauðlindum Kongó og byggði upp mikið viðskiptaveldi. Kabila-fjölskyldan á meðal annars demantanámuleyfi á landamærunum við Angóla og rekur meðal annars banka, bóndabýli, eldsneytisdreifingarfyrirtæki, flugfélög, vegagerð, hótel, lyfjafyrirtæki, ferðaskrifstofu, snyrtistofu og næturklúbba.[4]

Samkvæmt kongósku stjórnarskránni sem tekin var upp árið 2006 hefði seinna kjörtímabili Kabila átt að ljúka þann 19. desember árið 2016.[4] Embættismenn ríkisins gáfu í skyn að nýjar forsetakosningar yrðu haldnar í nóvember árið 2016 en kosningunum var síðar frestað til ársins 2018. Röksemdir ríkisins voru að framkvæmd kosninganna kostaði of mikið.[5] Kabila tilkynnti í ágúst árið 2018 að hann myndi ekki gefa kost á sér á ný.

Eftir kosningar sem haldnar voru í lok ársins 2018 tók einn af leiðtogum stjórnarandstöðunnar, Félix Tshisekedi, við af Kabila sem forseti Kongó.[6] Kabila hefur hins vegar verið vændur um að reyna að stjórna landinu áfram á bak við tjöldin.[7] Hann flutti ekki strax út úr forsetahöllinni í Kinsasa[8] og eftir að Tshisekedi varð forseti var Kabila lýstur bæði „heiðursforseti“ og þingmaður til lífstíðar.[9]

Í júlí árið 2020 rauf Tshisekedi hins vegar bandalag sitt við Kabila og flokk hans vegna ósættis um útnefningar til embætta í hernum, stjórnlagadómstólnum og kjörstjórninni.[10] Í kjölfarið tókst Tshisekedi að semja við liðhlaupa úr flokki Kabila og skipa nýja stjórn án aðkomu forvera síns. Talið er að með þessu hafi Tshisekedi tekist að einangra Kabila og ýta gamla forsetanum frá völdum.[11]

Í október 2021 varði Joseph Kabila útskriftarritgerð sína við háskólann í Jóhannesarborg. Meistarapróf í stjórnmálafræði og alþjóðasamskiptum hlaut hann að loknu námi sem stóð í fimm ár.

Tilvísanir[breyta | breyta frumkóða]

  1. „Kabila orðinn forseti“. Vísir. 7. desember 2006. Sótt 9. ágúst 2018.
  2. „Kabila lýstur sigurvegari í Kongó“. RÚV. 9. desember 2011. Sótt 9. ágúst 2018.
  3. Soderlund, Walter C.; DonaldBriggs, E.; PierreNajem, Tom; Roberts, Blake C. (1. janúar 2013). Africa's Deadliest Conflict: Media Coverage of the Humanitarian Disaster in the Congo and the United Nations Response, 1997–2008. Waterloo: Wilfrid Laurier University Press.
  4. 4,0 4,1 „Kabila heldur í völdin“. Viðskiptablaðið. 20. desember 2016. Sótt 9. ágúst 2018.
  5. „Eiga ekki fyrir kosningum“. Viðskiptablaðið. 16. febrúar 2017. Sótt 9. ágúst 2018.
  6. „Ts­hisekedi lýst­ur for­seti í Kongó“. mbl.is. 10. janúar 2019. Sótt 24. janúar 2019.
  7. „En RDC, les 100 premiers jours du président Tshisekedi dans l'ombre de Kabila“ (franska). Le Monde. 6. maí 2019. Sótt 2. júní 2019.
  8. „RDC: où loger le nouveau président de la République congolaise F. Tshisekedi ? - RFI“ (franska). RFI Afrique. Sótt 2. júní 2019.
  9. „Par ce geste, Joseph Kabila prouve qu'il reste le véritable patron de la RDC“ (franska). La Libre.be. Sótt 2. júní 2019.
  10. „RDC: «grande suprise» du premier ministre devant les ordonnances du chef de l'Etat“. Le Figaro.fr (franska). Le Figaro. 21. júlí 2020. Sótt 2. júlí 2022.
  11. „RD Congo : comment Félix Tshisekedi a réussi à tourner la page Joseph Kabila“ (franska). France 24. 6. febrúar 2021. Sótt 2. júlí 2022.


Fyrirrennari:
Laurent-Désiré Kabila
Forseti Lýðstjórnarlýðveldisins Kongó
(26. janúar 200124. janúar 2019)
Eftirmaður:
Félix Tshisekedi