Jens Steindór Benediktsson
Jens Steindór Benediktsson (13. ágúst 1910 – 1. desember 1946) var íslenskur guðfræðingur, blaðamaður, þýðandi og rithöfundur. Hann fæddist á Spákonufelli á Skagaströnd en fluttist með foreldrum sínum til Reykjavíkur árið 1925. Árið 1935 var hann meðal félaga í Flokki þjóðernissinna og árið eftir varð hann ritstjóri málgagns flokksins, Íslands. Árið 1938 var hann í 20. sæti lista flokksins fyrir bæjarstjórnarkosningar í Reykjavík og þá titlaður laganemi.
Hann giftist Guðríði Guðmundsdóttur árið 1940 og sama ár eignuðust þau dóttur. Um sama leyti hóf hann nám í guðfræði við Háskóla Íslands og tók að sér blaðaskrif í lausamennsku fyrir Morgunblaðið, einkum knattspyrnulýsingar. Hann lauk prófi í guðfræði árið 1942 og átti að taka við prestsembætti að Hvammi í Laxárdal ári síðar. Þegar til kom var prestsetrið ekki laust til ábúðar. Hann ákvað því að verða um kyrrt í Reykjavík og gerðist blaðamaður hjá Morgunblaðinu. Þar fékkst hann við ritdóma og íþróttafréttir. Hann tók meðal annars þekkt viðtal við Halldór Laxness á Gljúfrasteini sem birtist í Morgunblaðinu 4. september 1946.
Jens gaf út eitt smásagnasafn með frumsömdum sögum, Vor á nesinu, sem kom út 1941 en áður hafði ein saga eftir hann birst í Eimreiðinni. Hann fékkst nokkuð við þýðingar og þýddi meðal annars Norsk æfintýri eftir Asbjørnsen og Moe, Sumar og ástir eftir Vicki Baum og Stríðsherrann á Mars eftir Edgar Rice Burroughs. Jens skrifaði hluta fyrsta bindis uppflettiritsins Hvar - Hver - Hvað ásamt Geir Aðils sem kom út 1946.
Hann varð bráðkvaddur 36 ára gamall eftir aðeins fjögurra daga veikindi. Þau Guðríður eignuðust tvær dætur.
