Ingólfur Guðbrandsson
Ingólfur Guðbrandsson (6. mars 1923 – 3. apríl 2009) var einn mesti frumkvöðull Íslands á sviði ferðamála. Hann skipulagði ferðir fyrir Íslendinga um allan heim í áratugi. Eins var Ingólfur mikill tónlistarmaður og stjórnaði meðal annars Pólýfónkórnum í mörg ár. Ingólfur var skólastjóri Barnamúsíkskólans 1956-1957, námsstjóri tónlistarfræðslu á Íslandi hjá menntamálaráðuneytinu 1956-1963 og stundakennari við Tónlistarskólann í Reykjavík frá 1957-1960. Með Pólýfónkórnum stjórnaði Ingólfur fjölda verka sem sjaldan eða aldrei höfðu heyrst á Íslandi fram til þess tíma. Meðal þeirra má nefna Jóhannesarpassíu og Matteusarpassíu Bachs, Messías eftir Handel og Gloriu eftir Antonio Vivaldi og Francis Poulenc.[1]
Ingólfur stofnaði ferðaskrifstofuna Útsýn árið 1963 og var forstjóri fyrirtækisins til ársins 1988. Síðar stofnaði hann Heimsklúbb Ingólfs, Prima og rak til ársins 2002.
Börn Ingólfs eru Þorgerður Ingólfsdóttir, tónlistarkona og kórstjórnandi Hamrahlíðarkórsins og Kórs Menntaskólans við Hamrahlíð, Rut Ingólfsdóttir fiðluleikari sem er gift Birni Bjarnasyni fyrrverandi ráðherra, Vilborg Ingólfsdóttir, hjúkrunarfræðingur, Unnur María Ingólfsdóttir, fiðluleikari, Inga Rós Ingólfsdóttir, sellóleikari, Eva Mjöll Ingólfsdóttir, fiðluleikari, Andri Már Ingólfsson, forstjóri og Árni Heimir Ingólfsson, tónlistarfræðingur og píanóleikari.[2]
Ingólfur hlaut riddarakross Hinnar íslensku fálkaorðu árið 1977.
Endurminningabók Ingólfs, Lífsspegill, kom út árið 1989 skráð af Sveini Guðjónssyni. Eftirlátin gögn Ingólfs eru varðveitt á Tónlistarsafni Íslands og Borgarskjalasafni.
Útgefið efni
[breyta | breyta frumkóða]- Stóra reisubókin: Stefnumót við heiminn (ISBN 9979-60-982-6)
- 50 fyrstu söngvar. Reykjavík, 1957/1960.
Borgarskjalasafn
[breyta | breyta frumkóða]Gögn um Ingólf Guðbrandsson - http://www.borgarskjalasafn.is/Portaldata/21/Resources/borgarskjalasafn/skjalaskra/einstaklingar/Ing_lfur_Gu_brandsson_%28355%29.pdf%5Bóvirkur+tengill%5D