Fiskifélag Íslands

Fiskifélag Íslands er íslenskt félag stofnað 20. febrúar 1911 til að efla sjávarútveg og verslun með sjávarafurðir á Íslandi. Félagið starfaði í Reykjavík til 2004 þegar það flutti til Akureyrar, þar starfaði það fyrst og fremst sameiginlegur starfsvettvangur nokkurra aðildarfélaga uns því var slitið á árinu 2025.

Fyrsti forseti Fiskifélagsins og heiðursfélagi þess var Hannes Hafliðason.

Saga

Fiskifélagið var stofnað snemma árs 1911 með margþætt og metnaðarfull markmið. Því var ætlað að efla fiskveiðar landsmanna með því að kynna tækninýjungar í veiðum og vinnslu, stuðla að fræðslumálum sjómanna, rannsaka fiskistofna og efla vöruvöndun. Skipulag félagsins byggðist á félagsdeildum um allt land sem völdu fulltrúa á Fiskiþing sem voru fjölsóttar og veigamiklar samkomur um áratugi. Það fyrsta var haldið árið 1913.

Meðal fyrstu verkefna Fiskifélagsins var að beita sér fyrir framförum í vita- og hafnarmálum. Þá átti það stóran þátt í stofnun Slysavarnarfélags Íslands árið 1928. Á menntasviðinu kom félagið upp vélasal og skipulagði svokölluð mótoristanámskeið þar sem kennd var meðferð skipsvéla allt þar til námið var fært inn í Vélskóla Íslands árið 1966. Jafnframt stóð Fiskifélagið fyrir námskeiðum í stýrimannafræði, siglingafræði og sjóvinnu.

Fjöldi sérfræðinga á sviði sjávarútvegsfræða starfaði á vegum félagsins, þar á meðal fiskifræðingurinn Árni Friðriksson sem sinnti fiskirannsóknum á vegum þess frá 1933 til 1938 þegar Atvinnudeild Háskóla Íslands var komið á laggirnar.

Árið 1933 flutti félagið í nýjar og glæsilegar höfuðstöðvar á hornlóð neðst í Ingólfsstræti.

Fiskifélagið hafði á höndum ýmis verkefni fyrir stjórnvöld, s.s. varðandi öflun hvers kyns upplýsinga, tölfræði og gagna í tengslum við sjávarútveginn. Hluta þeirra var miðlað í tímaritinu Ægi auk annarra fræðslurita.

Í samvinnu við sjávarútvegsráðuneyti og Hafrannsóknarstofnun hélt félagið úti skólaskipti frá 1970 sem var notað til rannsókna og kennslu, m.a. fyrir skólabörn á höfuðborgarsvæðinu.

Á níunda og tíunda áratugnum fjaraði undan félaginu. Verkefnum frá ríkisvaldinu fækkaði og þar með minnkaði helsti tekjustofn þess. Húseignin við Ingólfsstræti var seld í aldarbyrjun og eftir það snerist starfsemin helst um samráð við stjórnvöld í tengslum við hvers kyns laga- og reglugerðarsetningu.

Aðildarfélög

• Farmanna- og fiskimannasamband Íslands
• Landsamband íslenskra útvegsmanna
• Landsamband smábátaeigenda
• Samtök fiskvinnslustöðva
• Sjómannasamband Íslands
• Starfsgreinasamband Íslands
• Vélstjórafélag Íslands

Tenglar

• Vefur Fiskifélagsins^{[óvirkur tengill]}