Bókasafn Kópavogs
Bókasafn Kópavogs er almenningsbókasafn staðsett í Hamraborg í Kópavogi frá 2002 en hafði áður verið í Fannborg. Það er hluti af Menningarhúsum Kópavogs, ásamt félagsmiðstöðinni Molanum, Gerðarsafni, Salnum og Náttúrufræðistofu Kópavogs. Safnið rekur útibúið Lindasafn í Núpalind 7.
Saga
[breyta | breyta frumkóða]1948 ræddi Jón úr Vör við oddvita Kópavogshrepps, Finnboga Rút Valdimarsson, um nauðsyn þess að stofna bókasafn. Kópavogshreppur lagði fyrst til fé til bókasafns árið 1949 þegar 2000 krónur voru lagðar fram. Í janúar 1953 var sent dreifibréf til íbúa Kópavogshrepps til að kanna áhuga á stofnun lestrarfélags. Undir bréfið rituðu Áslaug Eggertsdóttir, Jón Þorsteinsson og Jón úr Vör. Lestrarélagið var stofnað 15. mars 1953 og hafði í fyrstu aðsetur í Kópavogsskóla og síðan einnig í Kársnesskóla.[1]
Jón úr Vör og Sigurður Ólafsson voru fyrstu bókaverðir safnsins. Árið 1962 varð Jón einn bókavörður, en hafði skáldin Þorstein frá Hamri og Jón Óskar sér til aðstoðar um skamman tíma. Árið 1964 flutti safnið í 150 fermetra aðstöðu í nýju félagsheimili bæjarins. Árið 1981 flutti það svo í Fannborg 3-5 og var þar til húsa allt þar til það flutti í Hamraborg 6a þann 11. maí 2002. Sama ár var útibú frá safninu opnað í Lindaskóla í 190 fermetra húsnæði.
Forstöðumenn bókasafnsins hafa verið Jón úr Vör frá stofnun 1953 til 1977, Hrafn Andrés Harðarson sem hóf störf þar í ágúst 1976 og tók við af Jóni úr Vör i janúar 1977, og Lísa Zachrison Valdimarsdóttir sem tók við starfinu í ágúst 2015.[2]
Heimildir
[breyta | breyta frumkóða]- ↑ Andrés Kristjánsson og Björn Þorsteinsson (ritstj.) (1990). Saga Kópavogs - Þættir úr kaupstaðarsögunni 1955-1985. Lionsklúbbur Kópavogs.
- ↑ „Lísa ráðin forstöðumaður Bókasafns Kópavogs“. Kópavogsblaðið. 1.5.2015.