Andrew Tate

Andrew Tate árið 2023.

Emory Andrew Tate III (fæddur 1. desember 1986) er bandarískur og breskur áhrifavaldur og fyrrverandi heimsmeistari í sparkboxi sem er frægur fyrir umdeildar skoðanir sínar og það sem gagnrýnendur kalla eitraða karlmennsku. Ummæli hans hafa leitt til þess að hann hefur verið rekinn frá ýmsum samfélagsmiðlum og vakið upp áhyggjur af því að hann ýti undir kvenfyrirlitningu hjá áhorfendum sínum. Þrátt fyrir að vera umdeildur áhrifavaldur hefur hann safnað yfir 10 milljónum fylgjenda á samfélagsmiðlinum X. Hann var í þriðja sæti yfir einstaklinga sem mest var flett upp á Google árið 2023 og flestir fullorðnir Bretar þekkja til hans. Hann hefur verið nefndur „konungur eitraðrar karlmennsku“ og lýst sjálfum sér sem kvenhatara og öfgahægrisinna.

Árið 2005 hóf Tate feril sinn í sparkboxi í Bretlandi og vann til nokkurra titla fram yfir 2010. Árið 2016 tók hann þátt í bresku raunveruleikaþáttunum Big Brother en var síðar vikið úr hópnum vegna þess að hann var grunaður um nauðgun í rannsóknarmáli í landinu. Rannsókninni var síðar hætt en Tate var hins vegar krafinn um framsal árið 2024 vegna nauðgunarákæra. Eftir að ferli hans í sparkboxi lauk hófu Tate-bræðurnir, Andrew og Tristan, að reka fyrirtæki þar sem fyrirsætur komu fram á vefmyndavél og framkvæmdu kynferðislegar athafnir fyrir áhorfendur. Þeir hófu síðan að selja námskeið á netinu og með hjálp frá námskeiðum sínum gerði Andrew Tate garðinn frægan á netinu sem nokkurs konar talsmaður ráðandi karlmennsku. Námskeið hans eru meðal annars Hustler's University, sem hlaut 100.000 áskrifendur og var síðar endurreist undir nafninu The Real World, og The War Room, sem breska ríkisútvarpið (BBC) hefur sakað um að tæla konur til kynlífsstarfa og kenna nemendum ofbeldi gegn konum. Í ágúst 2023 var áætlað að brask hans Tate á netinu hefði skapað tekjur upp á 5 milljónir bandaríkjadala á mánuði.

Í desember 2022 voru Tate og bróðir hans, Tristan, handteknir í Rúmeníu ásamt tveimur konum. Í júní 2023 voru þau fjögur ákærð fyrir nauðgun, mansal og fyrir að hafa stofnað skipulögð glæpasamtök til að misnota konur kynferðislega. Skömmu síðar er sagt að konurnar, sem kærðu þá, hafi farið í felur vegna ofsókna á netinu. Í kjölfarið höfðuðu Tate-bræðurnir meiðyrðamál og kröfðust fimm milljóna bandaríkjadala í skaðabætur. Í ágúst 2024 gerði rúmenska lögreglan húsleit á fjórum eignum hans Tate sem tengdust rannsókn á mansali á ólögráða einstaklingum, kynmökum með ólögráða einstaklingi, peningaþvætti og tilraunum til þess að hafa áhrif á framburð vitna. Tate-bræðurnir hafa neitað öllum ákærum og ásökunum. Í mars 2024 fengu breskir lögreglumenn handtökuskipun á hendur Tate-bræðrunum. Í maí 2025 lagði ríkissaksóknari í Bretlandi fram fjölmargar ákærur á hendur Tate og bróður hans, Tristan, þar á meðal fyrir nauðgun, mansal og að valda stórfelldu líkamstjóni. Í júlí 2024 var einkamál höfðað gegn Tate-bræðrunum og þriðja aðila í Bretlandi vegna meintra skattsvika.

Í mars 2025 var Andrew Tate með samtals sex lögreglurannsóknir yfir höfði sér í Rúmeníu, Bretlandi og Bandaríkjunum. Fjórar rannsóknanna voru vegna sakamála en tvær vegna einkamála.