Þilfar

Þilfarið á skipinu Falls of the Clyde er úr járni með gólf úr timbri og nokkur þilfarshús.

Þilfar eða dekk er á stærri skipum lárétt plata eða gólf sem liggur yfir skipsskrokknum öllum eða að hluta, ver áhöfn og farm fyrir veðri og vindum og er aðalvinnusvæði skipsins. Á stærri skipum geta verið mörg þilför hvert upp af öðru líkt og hæðir í húsi. Sum þilför bera sérstök nöfn eftir því hvert hlutverk þeirra er.

Tilkoma þilskipa með samfellt, vatnsþétt þilfar stafna á milli markaði ákveðið skref í þróun útgerðar. Þilskipaútgerð sem einnig er nefnd skútuöld var stórbreyting á atvinnulífi á Íslandi sem stóð yfir frá síðustu áratugum 18. aldar  og fram á fyrstu áratugi 20. aldar.

Algeng þilfarsnöfn

• Aðalþilfar er venjulega efsta þilfar skips sem nær samfellt stafna á milli. Allt fyrir ofan aðalþilfarið telst vera yfirbygging.
• Bátaþilfar þar sem björgunarbátar eða skipsbátar eru geymdir.
• Byssuþilfar þar sem fallbyssur eru festar.
• Veðurþilfar er þilfar sem er opið fyrir veðri og vindum. Á yfirleitt við um efsta þilfarið eða gangveg efst meðfram borðstokknum innanverðum.
• Vinnsluþilfar er útbúið aðstöðu og tækjum til að vinna afla fiskiskips fyrir flutning og/eða sölu.
• Þyrluþilfar með þyrlupalli.

  Þessi skipagrein er stubbur. Þú getur hjálpað til með því að bæta við greinina.