Víkingur Heiðar Ólafsson

Úr Wikipediu, frjálsa alfræðiritinu
Jump to navigation Jump to search

Víkingur Heiðar Ólafsson (fæddur 1984) er íslenskur píanóleikari.

Víkingur hefur leikið á tónleikum víða í Evrópu, Asíu, Bandaríkjunum og Kanada[1] og komið fram sem einleikari með hljómsveitum á borð við Philharmonia Orchestra í Lundúnum[2], Hljómsveit Danska ríkisútvarpsins[3], Fílharmóníusveitina í Turku í Finnlandi[4] og BBC-sinfóníuhljómsveitina í Ulster[5]. Víkingur hefur hlotið fjölda viðurkenninga fyrir píanóleik sinn og tónlistarstarf, meðal annars Íslensku bjartsýnisverðlaunin 2009[6] og Íslensku tónlistarverðlaunin átta sinnum. Árið 2014 gekk Víkingur til liðs við alþjóðlegu umboðsskrifstofuna Harrison Parrott[7], árið 2016 skrifaði hann undir útgáfusamning hjá þýsku hljómplötuútgáfunni Deutsche Grammophon[8], og gaf skömmu síðar út sína fyrstu hljómplötu undir merkjum hennar.

Opnunartónleikar Hörpu[breyta | breyta frumkóða]

Víkingur lék píanókonsert Edvards Griegs með Sinfóníuhljómsveit Íslands undir stjórn Vladímírs Ashkenazy á opnunartónleikum tónlistarhússins Hörpu í Reykjavík 2011[9]. Víkingur hefur síðan komið fram með Ashkenazy á tónleikum í Kaupmannahöfn[10] og Birmingham[11].

Flutningur á nýrri tónlist[breyta | breyta frumkóða]

Víkingur hefur frumflutt fjóra íslenska píanókonserta, eftir Daníel Bjarnason, Hauk Tómasson, Snorra Sigfús Birgisson[12] og Þórð Magnússon[13]. Meðal erlendra tónskálda sem Víkingur hefur starfað með er bandaríska tónskáldið Philip Glass, en Víkingur hefur leikið píanóetýður hans með honum á tónleikum í Reykjavík[14], Gautaborg[15] og Lundúnum[16]. Víkingur hefur einnig starfað með enska tónskáldinu Mark Simpson[17].

Útgáfa[breyta | breyta frumkóða]

Síðla árs 2016 var tilkynnt um að Víkingur hefði undirritað útgáfusamning við þýsku tónlistarútgáfuna Deutsche Grammophon[8]. Fyrsti hljómdiskur hans hjá útgáfunni kom út í janúar 2017, en diskurinn var helgaður píanóverkum bandaríska tónskáldsins Philips Glass og gefinn út í tilefni af áttræðisafmæli hans[18]. Diskurinn hlaut einróma lof gagnrýnenda[19][20][21] og var m.a. valinn með bestu klassísku hljómdiskum ársins 2017 á vef NPR[22], Gramophone[23] og New York Times[24].

Árið 2010 stofnaði Víkingur útgáfufyrirtækið Dirrindí, og hefur hann gefið út þrjá hljómdiska undir merkjum þess. Árið 2010 kom út diskurinn Debut með verkum Beethovens og Brahms, og árið 2011 diskurinn Chopin – Bach, með prelúdíum Chopins og partítum Bachs[25]. Árið 2012 kom út diskurinn Winterreise, þar sem Kristinn Sigmundsson syngur Vetrarferðina eftir Schubert við meðleik Víkings. Diskurinn hlaut Íslensku tónlistarverðlaunin sem tónlistarupptaka ársins 2012 á sviði sígildrar- og samtímatónlistar[26].

Tónlistarhátíðir[breyta | breyta frumkóða]

Víkingur er stofnandi og listrænn stjórnandi tónlistarhátíðarinnar Reykjavík Midsummer Music, sem haldin hefur verið árlega í Hörpu síðan 2012. Hátíðin hlaut tvenn verðlaun á Íslensku tónlistarverðlaununum 2012, sem tónlistarviðburður ársins í sígildri- og samtímatónlist, og Rogastans, nýsköpunarverðlaun Íslensku tónlistarverðlaunanna[27]. Víkingur er einnig listrænn stjórnandi sænsku tónlistarhátíðarinnar Vinterfest, en Víkingur tók við því starfi af klarinettuleikaranum Martin Fröst 2015[28].

Sjónvarp og útvarp[breyta | breyta frumkóða]

Víkingur vann að tónlistarþáttunum Útúrdúr, ásamt Höllu Oddnýju Magnúsdóttur og Viðari Víkingssyni, sem sýndir voru á RÚV 2013-14 og 2014-15, og tilnefndir voru til Edduverðlauna 2015[29]. Þáttunum var afar vel tekið af gagnrýnendum[30][31]. Víkingur hefur einnig gert útvarpsþætti fyrir Rás 1[32].

Samstarf með myndlistarmönnum[breyta | breyta frumkóða]

Árið 2014 var Víkingur hluti af gjörningi svissneska lisamannsins Romans Signers á Transart-hátíðinni í Bolzano í ítölsku ölpunum. Víkingur lék þar tónverkið Vers la Flamme eftir Alexander Scriabin á fljótandi sviði úti á Vernago-vatni, en flutningurinn truflaður af þyrlu sem sveimaði yfir honum[33]. Auk Signers hefur Víkingur starfað með videólistamönnunum Yann Malka og Lillevan[34].

Nám[breyta | breyta frumkóða]

Víkingur lauk bachelors- og meistaranámi frá Juilliard-skólanum í New York, þaðan sem hann útskrifaðist 2008. Aðalkennarar hans við skólann voru Jerome Lowenthal og Robert McDonald. Einnig sótti Víkingur píanótíma til Ann Schein. Víkingur lauk einleikaraprófi frá Tónlistarskólanum í Reykjavík 2001 undir handleiðslu Peters Maté, en áður lærði Víkingur hjá Erlu Stefánsdóttur[35].

Tengill[breyta | breyta frumkóða]

  • www.vikingurolafsson.com

Tilvísanir[breyta | breyta frumkóða]

  1. http://www.harrisonparrott.com/artist/profile/vikingur-olafsson
  2. http://www.birminghampost.co.uk/whats-on/arts-culture-news/review-philharmonia-orchestra-symphony-hall-10977143
  3. http://www.b.dk/musik/vi-holder-med-vikingur
  4. http://www.bach-cantatas.com/Bio/Olafsson-Vikingur.htm
  5. http://www.belfasttelegraph.co.uk/entertainment/music/review-ulster-orchestra-is-pulling-out-all-the-stops-34119741.html
  6. http://www.mbl.is/greinasafn/grein/1316762/
  7. http://www.harrisonparrott.com/news/icelandic-pianist-vikingur-olafsson-signs-to-harrisonparrott-for-general-management
  8. 8,0 8,1 http://www.deutschegrammophon.com/en/artist/olafsson/
  9. http://www.mbl.is/greinasafn/grein/1376793/
  10. http://www.b.dk/musik/vi-holder-med-vikingur
  11. http://www.birminghampost.co.uk/whats-on/arts-culture-news/review-philharmonia-orchestra-symphony-hall-10977143
  12. http://www.bach-cantatas.com/Bio/Olafsson-Vikingur.htm
  13. http://www.sinfonia.is/tonleikar-og-midasala/listamenn/vikingur-heidar-olafsson
  14. http://www.mbl.is/folk/verold/2014/01/27/philip_glass_og_vikingur_heidar_saman_a_tonleikum/
  15. http://www.gp.se/n%C3%B6je/musik/philip-glass-the-etudes-philip-glass-maki-namekawa-v%C3%ADkingur-%C3%B3lafsson-piano-1.436324
  16. https://www.ft.com/content/25aaddf0-ef27-11e4-a6d2-00144feab7de
  17. http://www.gramophone.co.uk/classical-music-news/mark-simpson-named-as-the-bbc-philharmonics-new-composer-in-association
  18. https://www.nytimes.com/2017/08/11/arts/music/the-pianist-vikingur-olafsson-on-why-philip-glass-matters.html
  19. https://www.gramophone.co.uk/review/glass-%C3%A9tudes-%E2%80%93-selection-glassworks-%E2%80%93-opening
  20. http://artsfuse.org/157212/cd-reviews-philip-glass-piano-works-and-dessays-pictures-of-america/
  21. http://artsfuse.org/157212/cd-reviews-philip-glass-piano-works-and-dessays-pictures-of-america/
  22. https://www.npr.org/sections/deceptivecadence/2017/12/19/570182207/npr-musics-top-10-classical-albums-of-2017
  23. https://www.gramophone.co.uk/feature/critics-choice-2017
  24. https://www.nytimes.com/2017/12/13/arts/music/best-classical-music-recordings-2017.html?rref=collection%2Fspotlightcollection%2Fclassical-music-reviews
  25. http://www.bach-cantatas.com/Bio/Olafsson-Vikingur.htm
  26. http://iston.is/previous-winners/
  27. http://reykjavikmidsummermusic.com/
  28. http://www.vinterfest.se/vikingur-olafsson-ny-konstnarlig-ledare-for-vinterfest/
  29. http://eddan.is/?page_id=1608
  30. http://www.dv.is/menning/2015/1/9/smitandi-ahugi/
  31. http://www.vb.is/skodun/skritnir-karlar-rimur-og-pianoleikur/96940/
  32. http://www.ruv.is/thaettir/fjorar-hendur-og-flygill
  33. https://vimeo.com/107397899
  34. https://vikingurolafsson.com/about/
  35. https://vikingurolafsson.com/about/