Sigrún Hrólfsdóttir
Sigrún Inga Hrólfsdóttir (f. 2. maí 1973) er íslensk myndlistarkona. Hún vinnur aðallega með teikningu, málverk, gjörninga og innsetningar.
Sigrún er ein af stofnendum Gjörningaklúbbsins / The Icelandic Love Corporation árið 1996, ásamt Dóru Ísleifsdóttur, Eirúnu Sigurðardóttur og Jóní Jónsdóttur. Sigrún nam myndlist á listasviði Fjölbrautaskólans í Breiðholti frá 1990-1993, við grafíkdeild Myndlista- og handíðaskóla Íslands frá 1993-1996 og Pratt Institute í New York frá 1996-1997. Hún lauk MA gráðu í heimspeki frá Háskóla Íslands árið 2016. Hún er prófessor við myndlistardeild Listaháskóla Íslands. Sigrún var deildarforseti myndlistardeildar Listaháskóla Íslands frá árinu 2016-2021.
Sigrún hlaut Íslensku myndlistarverðlaunin árið 2024 fyrir áhugaverðasta endurlitið, sýninguna Rauður þráður, á verkum myndlistarkonunnar Hildar Hákonardóttur sem haldin var í Listasafni Reykjavíkur, Kjarvalsstöðum. Sýningin var afrakstur viðamikillar rannsóknar Sigrúnar Ingu Hrólfsdóttur, sýningarstjóra, á listferli Hildar.
Verk hennar Sigrúnar og Gjörningaklúbbsins hafa verið sýnd í Listasafni Íslands, Listasafni Reykjavíkur, Nýlistasafninu, ARoS[1], Amos Andersson Museum í Helsinki og MoMA í New York, auk fjölda annarra sýningarstaða. Árið 2007 vann Sigrún ásamt Gjörningaklúbbnum búninga og kynningarefni fyrir Björk á plötunni Volta. Sigrún býr á Seltjarnarnesi. www.sigrunhrolfsdottir.com