Rotherham United

Úr Wikipediu, frjálsa alfræðiritinu
Jump to navigation Jump to search
Rotherham United Football Club
Fullt nafn Rotherham United Football Club
Gælunafn/nöfn The Millers
Stofnað 1925
Leikvöllur New York Stadium
Stærð 12.021
Stjórnarformaður Tony Stewart
Knattspyrnustjóri Paul Warne
Deild Enska meistaradeildin
2019/2020 23. af 24
Heimabúningur
Útibúningur

Rotherham United er enskt knattspyrnulið frá Rotherham í Suður-Yorkshire sem spilar í League One. Liðið var stofnað árið 1925 en þá sameinuðust liðin Rotherham County (stofnað 1877) og Rotherham Town (stofnað 1899). Kári Árnason spilaði með félaginu 2012-2015.

Saga[breyta | breyta frumkóða]

Knattspyrnusaga borgarinnar Rotherham er býsna flókin. Á tíunda áratug nítjándu aldar var Rotherham Town öflugasta liðið í bænum, var sigursælt í Miðlanda-deildinni á tíunda áratug nítjándu aldar og átti þrjú keppnistímabil í annarri deild ensku deildarkeppninnar, frá 1893-96 þegar félagið var lagt niður.

Þremur árum síðar sameinuðust tvö minni félög í borginni undir heitinu Rotherham FC, en árið 1905 var nafninu breytt í Rotherham Town FC, til samræmis við gamla borgarliðið. Sama ár breytti annað Rotherham-félag, Thornhill FC, sem stofnað var árið 1877, nafni sínu í Rotherham County FC. Kepptu bæði félög saman í Miðlanda-deildinni næstu árin.

Rotherham County efldist mjög í byrjun annars áratugarins og vann Miðlanda-deildina fjögur ár í röð frá 1912-15 og uppskar að launum sæti í deildarkeppninni, fyrst í annarri deild en eftir að þriðja deild (norður) var stofnuð féll félagið fljótlega niður í hana og endaði loks á botninum í lok sinnar sjöttu leiktíðar 1924-25. Fyrirkomulagið á þessum árum var á þann veg að félög sem höfnuðu í neðstu sætum deildarkeppninnar urðu að fara í gegnum kosningu til að fá áframhaldandi keppnisrétt og voru lið sem ekki voru talin lífvænleg í mikilli hættu á að vera kosin út. Því varð úr að Rotherham-liðin tvö sameinuðust vorið 1925 og tóku upp heitið Rotherham United.

Næsta aldarfjórðungnum varði Rotherham í þriðju deild (norður), yfirleitt nær botni en toppi. Eftir seinni heimsstyrjöldina tók landið að rísa og Rotherham hafnaði nokkur ár í röð rétt við toppinn uns liðinu tókst að vinna þriðju deild (norður) vorið 1951. Fjórum árum síðar, 1954-55, náði Rotherham United sínum besta árangri fyrr og síðar þegar félagið hafnaði í þriðja sæti í næstefstu deild með lakari markatölu en Birmingham City og Luton Town sem þar með komust upp í efstu deild.

Rotherham United hélt sér í næstefstu deild til 1968 en á áttunda áratugnum seig á ógæfuhliðina og fór félagið alveg niður í fjórðu deild. Lengst af hefur liðið þó rokkað á milli annarar og þriðju efstu deildar. Liðið hefur tvisvar í sögunni komist í 16-liða úrslit bikarkeppninnar og árið 1961 lék það til úrslita í deildarbikarkeppninni sem þá var haldin í fyrsta sinn. Mótherjarnir í úrslitaeinvíginu voru Aston Villa og vann Rotherham heimaleikinn 2:0 en tapaði útileiknum með þremur mörkum gegn engu.

Heimildir[breyta | breyta frumkóða]